Mánerlep syrǵanaýdan Qazaqstan quramasyna jańa jattyqtyrýshy keldi. Ol – Reseidiń eki dúrkin chempiony, Eýropa chempionattarynyń júldegeri Sergei Voronov. Bul týraly «Denis Ten Memorial Challenge 2021» halyqaralyq týrniriniń ashylýy aldynda belgili boldy, dep habarlaidy QazAqparat týrnirdiń baspasóz qyzmetine silteme jasap.
«Osy týrnirden qazaqstandyq mánerlep syrǵanaý sportynyń jańa kezeńi bastalady. Sporttyq dodaǵa túrli óńirden balalar keldi. Jetistikter – bolashaqta qandai da bir jetistikke qol jetkizýi múmkin daryndy sportshylardy anyqtaýdan bastalady. Biz buqaralyq sportty damytý jolynda kóp eńbektenýimiz kerek. Bul tarihi sát – endi mánerlep syrǵanaýshylarymyzdy myqty sportshylardyń biri, Denistiń dosy Sergei Voronov daiyndaidy. Usynysty qabyldaǵany úshin oǵan shyn júrekten alǵysymdy bildiremin», - dep atap ótti Denis Ten Foundation direktory, Qazaqstannyń konkimen syrǵanaýshylary ulttyq federatsiiasynyń vitse-prezidenti Oksana Ten.
«Men úshin Qazaqstanda jumys isteý – úlken abyroi. Bul – úlken jaýapkershilik, osynda bolǵanyma rizamyn», - dep atap ótti S.Voronov.
Jeke mánerlep syrǵanaýda óner kórsetetin Sergei Voronov – 2014 jylǵy Eýropa chempionatynyń kúmis júldegeri, 2015 jylǵy Eýropa chempionatynyń qola júldegeri, 2014/2015 jyldarǵy Gran-pri maýsymy aqtyq saiysynyń qola medal iesi, 2015 jylǵy komandalyq álem chempionatynda kúmis júldege ie bolǵan. Reseidiń eki dúrkin chempiony (2008, 2009). 2017 jyly NHK Trophy Gran-pri seriiasy jarysynyń jeńimpazy atanǵan. 2014 jyly Finliandiia Oljasy «Chellendjer» jarys toptamasynyń jáne Nepela memorialynyń (2016) jeńimpazy. Óz mansabyn bir jyl buryn aiaqtaǵan.
Eske sala keteiik, mánerlep syrǵanaýdan «Denis Ten Memorial Challenge» (ISU) Halyqaralyq týrniri Nur-Sultan qalasyndaǵy «Barys Arena» sport kesheninde 2021 jyldyń 28-31 qazan kúnderi aralyǵynda ótedi.
