Eńbek jáne halyqty áleýmettik qorǵaý ministrligi mamyr aiynan bastap múgedek jandarǵa kóbeitilgen járdemaqy beriletinin jariialady, dep habarlaidy "Ult aqparat".
Jalpy múmkindigi shekteýli jandarǵa beriletin járdemaqy mólsheri kúnkóris minimýmy men respýblikalyq biýdjet týraly zańǵa sáikes, múgedektiń sebebi men tobyna bailanysty beriledi. Eńbek jáne halyqty áleýmettik qorǵaý ministrliginiń habarlaýynsha 2020 jyly járdemaqy mólsheri eki ret ósken.
«Ózderińiz biletindei, 2020 jyldyń 1 qańtarynan bastap infliatsiianyń boljamdy 5 paiyzdyq deńgeiin eskere otyryp, járdemaqylardyń jyl saiynǵy kezekti indeksatsiiasy júrgizilgen bolatyn. Osy jyldyń 1 sáýirinen bastap, Memleket basshysynyń 2020 jylǵy 31 naýryzda bergen tapsyrmasyn oryndaý maqsatynda múgedektik boiynsha beriletin memlekettik áleýmettik járdemaqylardyń mólsheri jyl saiyn 10 paiyzǵa indeksteledi. Mamyr aiynan bastap múgedektik boiynsha memlekettik áleýmettik járdemaqylar joǵarylatylǵan mólsherde berile bastaidy», - dep habarlaidy ministrlikten.
Máselen múgedektik boiynsha memlekettik áleýmettik járdemaqy mólsheri jalpy aýrýdan, eńbek zaqymynan, kásipke bailanysty aýrý toptary boiynsha: I topqa 62 723 teńgeden, II topqa – 49 983 teńgeden, III topqa – 33 975 teńgeden beriledi. 16 jasqa deiingi múgedek balalar 45 736 teńge alady. 16-18 jas aralyǵyndaǵy múgedek balalardyń I tobyna jatatyndar 62 723 teńge, II tobyna jatatyndar 51 943 teńge, III tobyna jatatyndarǵa 39 202 teńge beriledi. Múgedek balany asyrap otyrǵan adamǵa 45 736 teńge, al I toptaǵy múgedekti kútip-baǵyp otyrǵan adamǵa da 45 736 teńgeden tapsyrylady.
«Tótenshe jaǵdai kezinde múgedekterge tamaq pen turmystyq paket nemese 2 AEK mólsherinde aqshalai ótemaqy berildi. 132 myńnan astam múmkindigi shekteýli janǵa jáne múgedek balany tárbielep otyrǵan otbasylplǵa «Birgemiz» qoǵamdyq qorynan 50 000 teńge kóleminde aqshalai kómek kórsetildi. Sonymen qatar, Qazaqstan Respýblikasy Prezidentiniń 1, 2, 3 toptaǵy múgedekterdiń karantin jáne tótenshe jaǵdai kezeńinde kommýnaldyq qyzmetter boiynsha tólem mólsherin azaitý jónindegi júieli sharalardy ázirleý bóligindegi tapsyrmasyn oryndaý aiasynda múgedek balalardy tárbielep otyrǵan otbasylarǵa, múgedekter men Uly Otan soǵysynyń ardagerleri jáne múgedekter men Uly Otan soǵysynyń ardagerlerine teńestirilgen adamdarǵa, basqa sanattaǵy azamattarǵa 15000 teńge kóleminde aqshalai ótemaqy qarastyrylǵan», - delingen habarlamada.
Sonymen qatar elde tótenshe jaǵdai rejiminiń engizilýine bailanysty meditsinalyq-áleýmettik saraptama júrgizý mehanizmderi qaita qarastyryldy. «Elektrondy úkimet» veb-portalyndaǵy «Elektrondy qyzmet» servisi arqyly berilgen elektrondy ótinim negizinde syrttai meditsinalyq-áleýmettik saraptama júrgizý jumysy reglamentteldi. 1 sáýirden bastap №109 buiryqqa ózgerister engizilip, múgedektik merzimin avtomatty túrde uzartý quqyǵy berildi.
«Tótenshe jaǵdai aiaqtalǵannan keiingi kezeń úshin koronavirýs infektsiiasynyń aldyn alý sharasy retinde múgedektik merzimin qaita tekserýden ótken kúnnen bastap úsh aiǵa avtomatty túrde uzartý týraly buiryq qabyldandy. Bul sharalar múgedekterge áleýmettik qoldaý kórsetý, sondai-aq tótenshe jaǵdai rejimi aiaqtalǵannan keiin karantindik sharalardy saqtaý maqsatynda júrgizildi. Múgedektikti avtomatty túrde uzartý meditsinalyq-áleýmettik saraptamaǵa qujattardy rásimdeý kezinde azamattardyń virýs juqtyrý qaýpin azaitady», - delingen habarlamada.
Sonymen qatar múgedekterdi ońaltý baǵdarlamasyn júzege asyrý merzimi de 3 aiǵa shegerildi. Burynnan bar barlyq ońaltý sharasy men kómekti tehnikalyq quralmen qamtamasyz etý tetikteri de saqtalady.
«Barlyq jeńildik pen áleýmettik qoldaý sharalary da úsh aiǵa uzartyldy. Járdemaqy buryn bekitilgen toptar men eńbek qabilettigin joǵaltý dárejesi boiynsha beriledi. Densaýlyq kúiiniń ózgerýine bailanysty múmkindigi shekteýli jandar buryn bekitilgen múgedektik merzimin qaita kýálándyra alady. Qazirgi tańda avtomatty túrde 18,3 myń múmkindigi shekteýli adamnyń múgedektik merzimi 3 aiǵa uzartylǵan», - dep habarlaidy Eńbek jáne halyqty áleýmettik qoldaý ministrliginen.
