Áleýmettik meditsinalyq saqtandyrý qorynyń sarapshylary birinshi toqsanda kórsetilgen meditsinalyq qyzmetterdiń tizimine 3823 qyzmet ótirik engizilgenin anyqtaǵan, dep habarlaidy QazAqparat.
Bul týraly Áleýmettik meditsinalyq saqtandyrý qorynyń Basqarma tóraǵasy Bolat Tókejanov Ortalyq kommýnikatsiialar qyzmetinde aitty.
«Qor halyqqa kórsetilgen meditsinalyq qyzmetterdiń sapasy men kólemine monitoringti jalǵastyrýda. 1 toqsannyń qorytyndysy boiynsha sarapshylarymyz 203,6 myń aqaýlardy anyqtady. Kelgen shyǵyn aiyppuldardy esepke alǵanda 3,5 mlrd teńge boldy», - dedi qor basshysy.
Sondai-aq, Bolat Tókejanov meditsinalyq uiymdardyń proaktivti monitoringi jańa engizilimi týraly aqparat berdi.
«Anyqtalǵan aqaýlardyń ishinde 29,3 mln teńgege 3 823 jalǵan esep berilgen. Budan bylai aqaý anyqtalǵan jaǵdaida, jetkizýshi qorytyndyǵa qol qoiylǵan kúnnen bastap 45 kúntizbelik kún ishinde aqaýlar men oryndalmaǵan mindettemelerdi joiýy kerek. Joiylmaǵan jaǵdaida aiyppuldar kózdelgen», -dep qosty qordyń basqarma tóraǵasy.
Jalpy birinshi toqsanda 321 meditsinalyq uiymda proaktivti monitoring júrgizilipti.
«610 mln teńgeni quraityn 61 362 áleýetti aqaý anyqtaldy. Alǵashqy tájiribe meditsinalyq uiymdar úshin jaǵdaidy túzetýge jáne odan ári aqaýlardyń aldyn alýǵa múddeli ekenin kórsetti. Proaktivti monitoring qorytyndysy boiynsha 61 myń aqaýdyń tek 10,4 myń aqaýy boiynsha meditsinalyq uiymdarǵa aiyppul salyndy», - dedi Bolat Tókejanov.
