Meditsinalyq saqtandyrý júiesiniń alǵysharttarynyń biri – profilaktikalyq sharalar, iaǵni syrqattyń aldyn alý sharalary. Densaýlyq kepili – kez kelgen aýrýdyń aldyn alý. Qalypty kúide aǵzanyń immýndyq júiesi adamdy qorshaǵan ortanyń ziiandy áserlerinen, sonyń ishinde ártúrli mikrobtar men virýstardan qorǵaidy. Al onyń qalypty júiesi buzylǵan jaǵdaida, iaǵni immýnitet álsiregen jaǵdaida adamnyń mikrobtar men virýstarǵa qarsy turýy tómendep, syrqattanǵysh keledi. Ásirese, aýa-raiy kúrt buzylyp, kún sýyta bastaǵannan-aq aǵza syr bere bastaidy. Ainalamyzdan sýyq tigen, tumaý tigen adamdardy jii kóremiz. Infektsiialyq aýrýlar kóbeiip, emdeý mekemelerine túsýshiler sany artýda.
Derekterge súiensek, 2018 jyldyń qorytyndysy boiynsha Astana qalasynda eresekter arasynda 1965 naýqas joǵarǵy tynys joldarynyń jedel qabynýy, 690 – qozdyrǵyshtary belgili jedel tonzillit, 81 - qozdyrǵyshtary belgisiz jedel tonzillit diagnozdarymen tirkelgen.
Balalar arasynda: 6 819 - qozdyrǵyshtary belgisiz tynys joldarynyń jedel infektsiiasy, 266 - qozdyrǵyshtary belgili jedel tonzillit, 470 - qozdyrǵyshtary belgisiz jedel tonzillit, 32 - joǵarǵy tynys joldary infektsiiasy diagnozdarymen tirkelgen.
«2019 jyly infektsiialyq aýrýlardy emdeý úshin qalalyq infektsiialyq aýrýhanaǵa 827,4 mln teńge, balalar infektsiialyq aýrýhanasyna 1 545,6 mln teńge bólindi. Bul, jalpy alǵanda, 2,3 mlrd qarjy, ótken jylmen salystyrǵanda 0,3 mlrd somaǵa kóp», - deidi ÁMSQ Astana qalasy boiynsha filialynyń direktory Nurlybek Qabdyqaparov.
Infektsiialyq aýrýlardyń tumaý, jel sheshek, qyzylsha, rotovirýsty infektsiia, t.b. túrleri óte kóp. Ár infektsiialyq aýrýdyń óz virýstary, bakteriialary, t.s.s. qozdyrǵyshtary bar. Infektsiialyq aýrýlardyń eń qaýiptisi, tolyq emdelmese aǵzanyń basqa da aýrýlaryn qozdyryp jiberedi. Sondyqtan infektsiialyq aýrýlardan saqtaný joldaryn bilgen jón.
Qazirgi sátte maýsymdyq ahýalǵa bailanysty sýyq tiiý, tumaý, baspa, tynys joldary syrqattary jii kezdesedi. Belgileri jaǵynan uqsaityndyqtan bolar, kópshilik sýyq tiiý men tumaýdy shatastyryp jatady. Sýyq tigende adam aǵzasy ony ózi de jeńe alady. Keide eleýli asqynýlar bolýy múmkin, árine. Degenmen, immýndyq júieni nyǵaitý jáne sýyq tiiý men tumaýdyń alǵashqy belgileri bilinisimen qoldy jýý, tynys alý joldaryn (muryn, tamaq) shaiý, iaǵni gigienany, tazalyq sharalaryn saqtai otyryp, saýyqtyrý sharasyn júrgizip, kez kelgen asqynýlardy boldyrmaýǵa bolady.
Meditsina salasy jetilgen, tehnika damyǵan qazirgi ýaqytta, árine, aýrýdy túrli joldarmen emdeýge bolady. Óz kezeginde, Áleýmettik meditsinalyq saqtandyrý qory emdeý mekemeleriniń meditsinalyq qyzmet kórsetý sapasyn óz baqylaýyna alǵan. Degenmen, aýrýdy emdegennen aldyn alǵan durys.
Esterińizge sala ketsek, Meditsinalyq saqtandyrý qory 2018 jyldan bastap tegin meditsinalyq kómektiń kepildik berilgen kólemi (TMKKK) jáne mindetti áleýmettik meditsinalyq saqtandyrý (MÁMS) paketteri boiynsha úkimet belgilegen sheńberde turǵyndar úshin qyzmetterdi satyp alýshy qarjy operatory bolyp tabylady. Iaǵni, halyqqa kórsetiletin meditsinalyq qyzmet sapasy – Qor baqylaýynda.
