Áleýmettik meditsinalyq saqtandyrý qorynyń basqarma tóraǵasy Bolat Tókejanov shaǵyn jáne orta biznes qyzmetkerleriniń meditsinalyq kómek alý múmkindigi shekteýli ekenin eskertti, dep habarlaidy QazAqparat.
Ortalyq kommýnikatsiialar ortalǵynda qor basshysy shaǵyn jáne orta biznes qyzmetkerleriniń tizimin jańartýdyń nelikten mańyzdy ekenin túsindirdi. Onyń sózine qaraǵanda, byltyr pandemiia kezinde Úkimettiń sheshimimen shaǵyn jáne orta biznes sýbektileri mindetti tólemderdi, onyń ishinde MÁMS jarnasyn tóleýden bosatylǵan bolatyn. Osylaisha júiedegi shaǵyn biznes qyzmetkerleriniń kóbi tizimnen shyǵyp qalǵan.
«Qazirgi ýaqytta jarnalardy tóleýden bosatylǵan jumys berýshilerdiń shamamen 20% (61 233 ShOB) óz qyzmetkerleriniń tizimin jańartqan joq. Osyǵan bailanysty atalǵan qyzmetkerlerde saqtandyrý mártebesi joq jáne meditsinalyq kómek alýda múmkindikteri shekteýli. Jumys berýshilerdi óz qyzmetkerleri úshin jaýapkershilik tanytýǵa jáne qordyń aqparattyq júiesine olardyń derekterin engizýge shaqyrǵym keledi. Qor óz tarapynan shaǵyn jáne orta biznes ókilderimen óńirler ákimdikteri men salyq organdary arqyly naqty jumysty jalǵastyrady», - dep qosty Bolat Tókejanov.
Sondai-aq ol MÁMS júiesine 1-toqsanda 183 mlrd teńge túskenin habarlady.
«Túsimderdiń eń kóp somasyn memlekettiń jeńildik berý jarnalary qurady. Onyń kólemi 95,4 mlrd teńge nemese barlyq túsimderdiń 52% degen sóz. Osylaisha, memleket burynǵysynsha halyq aldyndaǵy óziniń áleýmettik mindettemelerin oryndap otyr. Óz qyzmetkerleri úshin jumys berýshilerdiń aýdarymdary jalpy somada 44,4 mlrd teńge (24%), qyzmetkerlerdiń ózderi tóleitin jarna – 35,2 mlrd teńge (19%) boldy. Jeke kásipkerler, azamattyq-quqyqtyq sharttar boiynsha jumys isteitin derbes tóleýshiler jarnalarynyń úlesi 5% kóleminde», - dedi ÁMSQ tóraǵasy.
Qor basshysy MÁMS júiesine tólenetin tólemderdiń eń az somasy 12 aida 25 500 teńgeni (aiyna 2125 teńge) quraitynyn eske salyp ótti, bul saqtandyrylǵan adamǵa quny birneshe million teńge turatyn qymbat tekserýler, operatsiialar, EKO qosa alǵanda, TMKKK jáne MÁMS eki paketindegi meditsinalyq kómektiń aýqymdy tizbesine qol jetkizýge múmkindik beretini naqty aityldy.
