«Áleýmettik meditsinalyq saqtandyrý qorynyń» Nur-Sultan qalasy boiynsha filialynyń direktory Aidar Sitqazinov azamat bir jyl boiy aýyrmaǵan jaǵdaida mindetti saqtandyrýǵa aýdarǵan aqshasy qaida jumsalatynyn aitty, dep habarlaidy "Ult aqparat".
«Eger osy jyly aýyrmaǵan bolsańyz - saqtandyrýǵa aýdarǵan aqshańyz qaitarylmaidy. Meditsinalyq saqtandyrýdyń qaǵidasy: deni saý adam naýqas úshin, bai adam kedei adam úshin tóleidi. Eger biyl aýyrmaǵan bolsańyz – saqtandyrýǵa aýdarǵan aqshańyz aýyrǵan adamdardyń emine jumsalady. Al eger kelesi jyly siz aýyryp qalsańyz – saqtandyrýǵa qansha jinaǵanyńyzǵa qaramastan, sizge de tolyq meditsinalyq qyzmet túrleri kórsetiledi», - dedi Aidar Sitqazinov búgin elorda ákimdiginde ótken baspasóz máslihatynda.
Sondai-aq, ol ne sebepti jeke klinikalar da qarjylandyrylatynyn túsindirdi.
«Munyń bári meditsinalyq uiymdar arasynda báseke bolýy úshin kerek. Báseke bolǵan jerde jumys sapaly bolady», - dedi ol.
