Biylǵy jyldyń birinshi jartysynda almatylyq meditsina uiymdary jalpy quny 3,6 mlrd teńgeden asatyn konsýltativtik-diagnostikalyq qyzmet túrlerin kórsetti. Qyzmet aqysy mindetti áleýmettik meditsinalyq saqtandyrý paketi sheńberinde tólendi. Bul týraly «Áleýmettik meditsinalyq saqtandyrý qory» KEAQ Almaty qalalyq filialy direktory Tileýhan Ábildaev málim etti, dep habarlaidy "Ult aqparat".
Onyń aitýynsha, 2020 jyldyń alty aiynda Mindetti áleýmettik meditsinalyq saqtandyrý paketi sheńberinde kórsetilgen qyzmetter úshin emdeý mekemelerine 26,4 mlrd teńgeden astam qarjy tólengen. Qor halyqqa kórsetilgen qyzmet aqysy meditsinalyq kómektiń sapasy men kólemin teksergennen keiin aýdarady.
«Mindetti áleýmettik meditsinalyq saqtandyrý júiesi iske qosylǵaly beri azamattar buryn-sońdy óz qaltasynan tólep kelgen qyzmet túrlerin aqysyz paidalanýǵa múmkindik aldy. Máselen, alty aida saqtandyrý paketine engen diagnostikalyq qyzmetter ishinde KT, MRT syndy qyzmetterge suranystyń artqany baiqalady», - dedi filial basshysy.
Sonymen qatar, ol jyl basynan beri MÁMS paketi sheńberinde kórsetile bastaǵan meditsinalyq ońaltý qyzmetine degen suranystyń artqanyn atap ótti.
