Elordadaǵy Turǵyn úi qurylys jinaq banki (TQJB) Ortalyq fillialynyń direktory Jansultan Mataev biyl qalada «Nurly jer» baǵdarlamasy boiynsha 364 páter beriletinin aitty, dep habarlaidy Baq.kz agenttigi.
Búgin TQJB búkilálemdik jinaq kúnine orai arnaiy press týr uiymdastyryldy. Shara barysynda Jansultan Mataev jýrnalisterge «Nurly jer» baǵdarlamasyna aiasynda Máńgilik el dańǵyly jáne №27 men №36 kóshelerinde (QR PIB avtosharýashylyǵy janynda) salynyp jatqan úilerdi kórsetti.
Osy oraida TQJB Ortalyq fillialynyń direktory №227 (QR PIB MO emhanasynyń janynda) kóshesindegi turǵyn-úidiń qurylys bitkenin, ondaǵy 364 páterdi aldaǵy ýaqytta paidalanýǵa beriletinin atap ótti.
«Atalǵan turǵyn úidi salýǵa memleketten shamamen 4 mlrd 600 mln teńge bólindi. 2016 jyldyń kúzinde turǵyn úidi salý boiynsha tender ótip, ony «Edem» JShS jeńip aldy. Qazirgi tańda munda qurylys jumystary aiaqtaldy. Munda 364 páter bar. Sondai-aq búldirshinderge arnalǵan shaǵyn bala-baqshada qarastyrylǵan. Al 2019 jyly atalǵan baǵdarlama boiynsha 1825 páter paidalanýǵa berilmek», - dedi Jansultan Mataev press týr barysynda.
Sonymen qatar mundaǵy páterlerdiń baǵasy naryqtyq baǵadan eki ese tómenin jetkizdi.
«Nurly jer» baǵdarlamasy boiynsha salynǵan páterdiń bir sharshy metriniń quny – Astana, Almaty qalalary boiynsha 180 myń teńge, basqa qalalar úshin 140 myń teńge. Mysaly, bir bólmeli páterdiń baǵasy shamamen 7 mln teńge», - dedi basshy.
TQJB qyzmetkerleri №227 kóshesinde ornalasqan turǵyn úide 1 bólmeli 75 páter (37-40 sharshy metr), 2 bólmeli 168 páter (48-58 sharshy metr), 3 bólmeli 121 páter (72-78 sharshy metr) bar ekenin aitty.
Sondai-aq Jansultan Mataev atalǵan páterler arnaiy konkýrs boiynsha úlestiriletinin jetkizdi.
«Qazirgi tańda «Nurly jer» baǵdarlamasy boiynsha salynǵan páterlerdiń ielerin anyqtaý boiynsha Turǵyn úi qurylys jinaq bankinde arnaiy konkýs ótip jatyr. Iaǵni bank salymshylary men ákimdikte páter alýǵa kezekte turǵan azamattar arasynda jeke konkýrs uiymdastyrylýda. 6 qarasha konkýrstnyń nátijesi shyǵady», - dedi TQJB Ortalyq fillialynyń direktory.
Osy oraida ol «Nurly jer» baǵdarlamasy boiynsha páter alý úshin uiymdastyrylǵan konkýrstyń basty talabyn túsindirdi. Onyń aitýynsha, azamat mindetti túrde Turǵyn qurylys jinaq bankiniń salymshysy bolý kerek.
«Ol keminde 3 jyl bankte aqsha jinaýy qajet. Konkýrsqa qujat tapsyrǵanǵa deiin úmitkerler alǵashqy jarnanyń 20% jinaýy shart. Nesieniń jyldyq protsenttik mólsherlemesi – 5%. Eger azamat bizdiń bankte 7 mln teńge jinaǵan bolsa, páterdi birden satyp ala alady. Alaida páterge aqshasy jetpese, olar alǵashqy jarnanyń 20% salyp, páterdi nesiege alýǵa múmkindigi bar. Konkýrs ádiletti ótý úshin baldyq júieni engizdik. Kim aqshany ýaqytyndy salsa, sonyń baly joǵary bolady. Bul páter alýǵa múmkindikti joǵarylatady. Atalǵan baǵdarlamasy boiynsha páter alý úshin Astanada esepte turý mindetti», - dep túiindedi sózin Jansultan Mataev.
Aita keteiik, turǵyn úi qurylys jinaq bankinde astanalyqtarǵa tiesili 170 771 myń depozit bar. Jalpy elimizde turǵyn úi qurylys jinaq júiesin 1,2 mln adam qoldanady eken.
