2021 jylǵy 9-10 qazanda Premer-Ministr Asqar Mamin Birikken Arab Ámirlikterine jumys saparymen bardy. Bul týraly Úkimet basshysynyń baspasóz qyzmeti habarlady.
Abý-Dabi qalasynda Úkimet basshysy BAÁ Premer-Ministriniń orynbasary, Prezident isteri jónindegi ministr sheih Mansur ben Zaid ál Nahaianmen, sondai-aq Abu Dhabi Developmental Holding Company (ADQ) holdingteri jáne memlekettik damý institýttary men BAÁ-niń basqa da jetekshi kompaniialarynyń basshylyǵymen kelissóz júrgizdi.
Taraptar saýda-ekonomikalyq, qarjy-investitsiialyq, energetika, kólik-logistika, agroónerkásip jáne basqa da salalardaǵy buǵan deiin qol jetkizilgen ýaǵdalastyqtardy iske asyrý barysyn jáne ekijaqty yntymaqtastyq perspektivasyn talqylady. Qazirgi ýaqytta ámirlik kompaniialary Qazaqstanda jalpy quny 3,5 mlrd dollardan asatyn 11 iri investitsiialyq jobany iske asyrýǵa qatysýda.
Ótkizilgen kelissózder qorytyndysy boiynsha ekonomikanyń basym salalarynda jobalardy damytý boiynsha uzaq merzimdi strategiialyq áriptestik ornatý jónindegi úkimetaralyq kelisimge qol qoiyldy. Qujat QR ulttyq ekonomikasynyń energetikalyq, agroónerkásiptik, kólik-logistikalyq, farmatsevtikalyq jáne qarjy sektorlaryndaǵy jobalardy iske asyrýǵa baǵyttalǵan, investitsiialardyń jalpy kólemi 6 mlrd dollardan asady.
Kelisimdi iske asyrýdaǵy Qazaqstannyń negizgi áriptesi óńdeý jáne óndirý ónerkásibi, AÓK, kólik jáne logistika, qarjy, týrizm, media jáne energetika siiaqty sektorlarda keńinen usynylǵan Abý-Dabi ADQ egemen qory bolady. Qordyń basqarýynda 175 mlrd dollardan astam kólemdegi aktivter bar.
Kelisim aiasynda «Samuryq-Qazyna» AQ ADQ-men strategiialyq yntymaqtastyq ornatyp, jańartylatyn jáne dástúrli energetikany damytý jónindegi birlesken energetika holdingin qurýǵa nietti. QR-da qýaty 5 GVt bolatyn kún, jel jáne sý elektr stantsiialaryn salý boiynsha birlesken jobalardy jáne t.b. iske asyrý josparlanýda.
«Kazyna Capital Management» AQ jáne ADQ IT, qarjy tehnologiialary, agroteh, V2V jáne V2S, telekommýnikatsiialar, azyq-túlik ónimderin óndirý tehnologiialary, platformalyq sheshimder jáne tsifrlyq transformatsiia jáne ózge de salalarda birlesken startap-jobalardy qarjylandyrý úshin 100 mln dollarǵa birlesken venchýrlyq qor qurady.
ADQ QR-da kóterme-taratý ortalyqtary jelisiniń qurylysyna qatysady. Kompaniia sondai-aq Qazaqstannyń etti mal sharýashylyǵy, qus sharýashylyǵy jáne jemis baǵbanshylyǵynda birqatar iri jobany iske asyrý múmkindigin qarastyrýda.
«SQ-Farmatsiia» JShS men Rafed QR farmatsevtika ónerkásibin damytýda yntymaqtastyq ornatady.
Sapar aiasynda Shyǵys Qazaqstan oblysynyń ákimdigi, Sembol jáne Abu Dhabi Fund for Development kompaniialary QR ShQO-da «Katonqaraǵai» týristik kesheni qurylysynyń jobasyn júzege asyrý boiynsha yntymaqtastyqtyń bazalyq sharttary týraly kelisimge qol qoidy.
QR Aýyl sharýashylyǵy ministrligi men BAÁ Klimattyń ózgerýi jáne qorshaǵan orta ministrligi arasynda, sondai-aq AHQO men Abu Dhabi Global Market (ADGM) qarjy ortalyǵy men Abu Dhabi Securities Exchange (ADX) birjasy arasynda ózara túsinistik týraly memorandýmdarǵa qol qoiyldy.
Sonymen qatar, sapar aiasynda Qazaqstan men BAÁ poshta qyzmetteri «Estelik jáne mereitoilyq datalar» seriiasymen «Qazaqstan Respýblikasynyń Táýelsizdigine 30 jyl. Birikken Arab Ámirlikteriniń qurylǵanyna 50 jyl» taqyrybyndaǵy eki poshta markasyn birlesip shyǵarýdy júzege asyrdy.
Dýbai qalasynda Úkimet basshysy «EXPO 2020 Dubai» halyqaralyq kórmesine baryp, onda Qazaqstan, BAÁ, RF jáne taǵy basqa ulttyq pavilondarmen tanysty.
Jumys saparyna ulttyq ekonomika ministri Áset Erǵaliev, Aýyl sharýashylyǵy ministri Erbol Qarashókeev, Ádilet ministri Marat Beketaev, Shyǵys Qazaqstan oblysynyń ákimi Danial Ahmetov, «Samuryq-Qazyna» AQ basqarma tóraǵasy Almasadam Sátqaliev, Strategiialyq josparlaý jáne reformalar agenttigi tóraǵasynyń orynbasary Jaslan Mádiev, Energetika birinshi vitse-ministri Murat Júrebekov, BAÁ-degi QR elshisi Madiiar Meńilbekov, QR iskerlik toptarynyń ókilderi jáne ózgeler qatysty.
