QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda «Eńbek» memlekettik baǵdarlamasyn iske asyrý barysy qaraldy, dep habarlaidy "Ult aqparat" primeminister.kz saityna silteme jasap.
Premer-ministr dereginshe, barlyq memlekettik baǵdarlamalardy iske asyrý aiasynda biyl jumyspen qamtý sharalarymen 1 mln 220 myń adamdy qamtý josparlanǵan, olardyń ishinde 600 myń adamdy – «Eńbek» memlekettik baǵdarlamasy boiynsha, 255 myń adamdy – «Jumyspen qamtýdyń jol kartasy – 2020» baǵdarlamasy boiynsha, 364 myń adamdy – «Nurly jol», «Tsifrlyq Qazaqstan», «Nurly jer», BJK – 2020 jáne t. b. memlekettik baǵdarlamalar boiynsha jumysqa ornalastyrý kózdelgen.
«Eńbek» memlekettik baǵdarlamasy startap jobalardy shaǵyn nesieleý, biznesti keńeitý, qosymsha mamandyqtarǵa oqytý, áleýmettik jumys oryndaryna jumysqa ornalastyrý, eńbek kúshi mol aimaqtardan jumys kúshi tapshy óńirlerge kóshirý jáne t. b. sharalardy qamtidy. Atalǵan maqsattarǵa 176 mlrd tg qarastyrylǵan. Jyl basynan beri baǵdarlamaǵa qatysýǵa 260 myńnan astam adam ótinish bildirdi, olardyń 184 myńy – 70%-dan astamy — qazirgi ýaqytta jumysqa ornalastyrylǵan.
Premer jumyspen qamtý, ásirese, qazirgi ekonomika men biznesti qalpyna keltirý jaǵdaiynda basty basymdyqtardyń biri ekenin atap ótti.
«Biz kúrdeli jaǵdaidy bastan ótkerdik. Eki ai boiy tótenshe jaǵdai men karantin rejimi saqtaldy. Kásiporyndar men biznes jumys istemedi. Qazirgi tańda ekonomikany qalpyna keltirý úderisi júrip jatyr. Atalǵan jumys aiasynda daǵdarysqa qarsy sharalar toptamasy jáne ekonomikany jandandyrýǵa, jumys oryndaryn saqtaýǵa jáne ashýǵa baǵyttalǵan keshendi jospar qabyldandy. Biz azamattardy jumyspen, turaqty tabyspen qamtamasyz etýge, osylaisha olardyń ál-aýqatyn jaqsartýǵa tiispiz. Sondyqtan da jumyspen qamtý máselesi biz úshin asa mańyzdy», — dedi A. Mamin.
Úkimet basshysy Shyǵys Qazaqstan, Qostanai, Jambyl, Pavlodar oblystarynda jumyspen qamtýdy qoldaý sharalaryn iske asyrý qarqyny jaqsy ekenin atap ótti.
Onyń atap ótýinshe, Shymkent qalasynyń áleýmettik jumys oryndaryna jumysqa ornalastyrý, qoǵamdyq jumystarǵa jiberý jáne grant berý boiynsha kórsetkishteri kóńil kónshitpeidi. Sondai-aq Aqtóbe oblysy boiynsha grant berý deńgeii óte tómen. Mańǵystaý jáne Batys Qazaqstan oblystary shaǵyn nesie berý boiynsha nashar jumys júrgizýde. Munan bólek Batys Qazaqstan oblysynda áleýmettik jumys oryndaryna jumysqa ornalastyrý jáne jastar praktikasy boiynsha jumysty uiymdastyrý eń tómengi deńgeide bolyp otyr.
«Bul - ákimdikterdiń jetkiliksiz jumys istep jatqanynyń kórinisi, osy baǵyttar boiynsha shuǵyl túrde sharalar qabyldaý qajet. Jumyspen qamtýdy qoldaýdyń barlyq quraldary bar, olardy belsendi qoldaný qajet. Osy másele boiynsha biz turaqty ári júieli baqylaý júrgizetin bolamyz. Jarty jyldyń qorytyndysy boiynsha jumyspen qamtý máselesi Memleket basshysynyń tóraǵalyǵymen ótetin Úkimettiń keńeitilgen otyrysynda qaralady», — dedi A. Mamin.
Premer-Ministr barlyq memlekettik baǵdarlamalar boiynsha jumyspen qamtýdy jandandyrýdyń naqty sharalaryn qabyldaýdy tapsyrdy.
Jiyn barysynda Eńbek jáne halyqty áleýmettik qorǵaý ministri Birjan Nurymbetov, Qostanai oblysynyń ákimi Arhimed Muhambetov, Qyzylorda oblysynyń ákimi Gúlshara Ábdiqalyqova, Mańǵystaý oblysynyń ákimi Serikbai Trumov, Shymkent qalasynyń ákimi Murat Áitenov baiandama jasady.
