QR Premer-Ministri Asqar Mamin Batys Qazaqstan oblysyna jumys sapary aiasynda óńirdiń odan ári áleýmettik-ekonomikalyq damýy máseleleri jóninde keńes ótkizdi, sondai-aq kólik, turǵyn úi, injenerlik-kommýnikatsiialyq infraqurylym, AÓK jobalarynyń iske asyrylýyn tekserdi, dep habarlaidy QR Úkimetiniń baspasóz qyzmeti.
BQO-nyń áleýmettik-ekonomikalyq damýynyń 2021-2025 jyldarǵa arnalǵan keshendi josparyn ázirleý, áleýmettik-ekonomikalyq jaǵdai, infraqurylymdyq qurylys, elektrmen jáne gazben jabdyqtaý máseleleri, sondai-aq investitsiialyq jobalar týraly Premer-Ministrdiń orynbasary Roman Skliar, oblys ákimi Ǵali Esqaliev, indýstriia jáne infraqurylymdyq damý ministri Beibit Atamqulov, energetika ministri Maǵzum Myrzaǵaliev, ulttyq ekonomika vitse-ministri Álisher Ábdiqadyrov, qarjy vitse-ministri Marat Sultanǵaziev baiandady.
Batys Qazaqstan oblysynyń keshendi áleýmettik-ekonomikalyq damýy aiasynda bes jyl ishinde óńdeý ónerkásibin, AÓK, áleýmettik salany, turǵyn úi, kólik, injenerlik-kommýnikatsiialyq infraqurylymdy damytý, azamattyq qorǵaý men qorshaǵan ortany qorǵaýdy qamtamasyz etý boiynsha 141 is-sharany iske asyrý josparlanyp otyr. 2,4 trln teńge investitsiia tartý kózdelgen, onyń 80%-y – jeke menshik kapital.
Keshendi jospardy oryndaý 2025 jylǵa qarai óńdeý ónerkásibiniń kólemin jylyna 205-ten 300 mlrd teńgege deiin, ShOB úlesin 32,7%-dan 37,8%-ǵa deiin arttyrýǵa múmkindik beredi.
«Memleket basshysy Qasym-Jomart Toqaev Batys Qazaqstan oblysynyń damýyna úlken kóńil bóledi. Óńir ónerkásiptik damýdyń joǵary áleýetine ie. Ázirlenip jatqan áleýmettik-ekonomikalyq damýdyń keshendi josparynyń is-sharalaryn júzege asyrý investitsiia tartýǵa, jańa jumys oryndaryn qurýǵa jáne halyqtyń ál-aýqatyn arttyrýǵa eleýli serpin beredi», — dedi A. Mamin.
Premer-Ministr eki apta ishinde Keshendi jospardyń jobasyn Respýblikalyq biýdjet komissiiasynyń qaraýyna engizýdi tapsyrdy, sodan keiin másele Úkimet otyrysynda talqylanatyn bolady.
A. Mamin sondai-aq Batys Qazaqstan oblysynda munai-gaz jáne himiia ónerkásibin damytý máseleleri boiynsha otandyq jáne sheteldik investorlardyń – KPO b.v., Shell, Agip Karachaganak b.v, SRPM Resources Ltd., Nostrum Oil&Gas, ABS-Munai jáne t. b. qatysýymen jeke keńes ótkizdi. Ekonomikanyń atalǵan salalarynda jańa investitsiialyq jobalardy – munai jáne gaz óndirý kólemin ulǵaitý, sondai-aq olardy qaita óńdeý, MÓZ, kalii tyńaitqyshtaryn óndirý kombinatyn salý jáne t. b. iske asyrýdyń jai-kúii men perspektivasy qaraldy. Qarashyǵanaq ken ornyndaǵy investitsiialyq jobalardy ýaqytyly iske asyrýǵa, sonymen qatar ishki naryqty gazben qamtamasyz etýge erekshe nazar aýdaryldy.
Jumys sapary aiasynda A. Mamin Oral qalasyndaǵy halyqaralyq áýejaidy rekonstrýktsiialaý barysymen tanysty. Jobany iske asyrý jolaýshylar ainalymyn jylyna 200 myńnan 400 myń jolaýshyǵa deiin 2 esege arttyrýǵa múmkindik beredi. Ony 2021 jylǵy jeltoqsanda paidalanýǵa berý kózdelgen. Úkimet basshysyna Batys Qazaqstan oblysyndaǵy avtojoldardy rekonstrýktsiialaý jáne jańǵyrtý jobalarynyń iske asyrylýy, óńirdiń injenerlik-kommýnikatsiialyq jáne energetika infraqurylymyn damytý týraly baiandaldy.
Premer-Ministr «Batys Sý Arnasy» kásiporyndary men «Jaiyq Et» JShS-da, sondai-aq Terekti aýdanynyń Tuqpai aýylynda bolyp, «Nurly jer» baǵdarlamasy sheńberinde turǵyn úi infraqurylymy qurylysynyń barysymen, óńirdiń AÓK damýymen tanysty.
Biylǵy jyldyń 8 aiynda Batys Qazaqstan oblysynda qurylys jumystarynyń kólemi ótken jyldyń sáikes kezeńimen salystyrǵanda 2,9%-ǵa artyp, 88,5 mlrd teńgeni qurady. 302 myń sharshy metr (+2,7%) turǵyn úi paidalanýǵa berildi. Aýyl sharýashylyǵynyń jalpy óniminiń kólemi 0,7%-ǵa ósip, 120,9 mlrd teńgeni qurady.
