Úkimet basshysy Asqar Mamin Jambyl oblystyq máslihatynyń kezekten tys sessiiasyna qatysty, dep habarlaidy QR Úkimetiniń baspasóz qyzmeti.
Onda Memleket basshysy Qasym-Jomart Toqaevtyń óńir ákimi qyzmetine usynǵan Berdibek Saparbaevtyń kandidatýrasyna biraýyzdan kelisim berildi.
Jambyl oblysynyń aktivimen ótken keńeste A. Mamin Asqar Myrzahmetovtiń óńirdiń damýyna qosqan úlesin atap ótip, aimaq ákimi laýazymynda atqarǵan jumysy úshin alǵys bildirdi.
Jańa ákimdi tanystyrǵan Premer-Ministr onyń aimaqtyq jáne respýblikalyq deńgeilerdegi basshylyq qyzmetterdegi jumys tájiribesin atap ótti.
«Tuńǵysh Prezident – Elbasy Nursultan Ábishuly Nazarbaev pen Memleket basshysy Qasym-Jomart Kemeluly Toqaev Jambyl oblysynyń damýyna erekshe kóńil bóledi. Qazirgi tańda óńir basshylyǵynyń aldynda aýqymdy mindetter tur. Eń aldymen, ideologiialyq jumysqa jáne ultaralyq kelisimniń nyǵaiýyna, áleýmettik-ekonomikalyq jaǵdai men halyqtyń turmys sapasyn jaqsartýǵa basa nazar aýdarý qajet», - dedi A. Mamin.
Úkimet basshysy ekonomikanyń turaqty damýyn, investitsiialar tartý, jańa jumys oryndaryn qurý, azamattardyń ómir súrý sapasyn jáne tabysyn arttyrý boiynsha mindetterdi sheshýdiń mańyzdylyǵyn atap ótti.
«Berdibek Mashbekulyna basshylyq qyzmetterdegi tájiribesi men bilimi oblys aktivimen jáne máslihat depýtattarymen birlesip, Memleket basshysy alǵa qoiǵan mindetterdi sapaly oryndaýǵa múmkindik beretinine senimdimin», - dedi A. Mamin.
Kezdesýde oblystyq jáne qalalyq máslihattardyń hatshylary Baǵlan Qarasholaqov pen Batyrbek Kúlekeev, Taraz innovatsiialyq-gýmanitarlyq ýniversitetiniń rektory Erbolat Saýryqov pen «Qazfosfat» JShS bas direktory Muqash Eskendirov sóz sóilep, Memleket basshysy usynǵan Berdibek Saparbaevtyń kandidatýrasyna qoldaý bildirdi jáne Jambyl oblysynyń jańa ákimine tabysty ári jemisti jumys tiledi.
Berdibek Saparbaev 1953 jyly Qyzylorda oblysynda dúniege kelgen. Eńbek jolyn 1969 jyly «Zadarinskii» sovhozynyń jumysshysy retinde bastaǵan. 1977 jyly Almaty Halyq sharýashylyǵy institýtyn ekonomist mamandyǵy boiynsha bitirdi. Institýtty bitirisimen Respýblikalyq memlekettik eńbek jinaqtaý kassalary basqarmasynda ekonomist bolyp eńbek etti.
Túrli jyldary Berdibek Saparbaev Prezident Apparatynda, Ministrler kabineti Apparatynda, QazKSR Qarjy ministrliginde, QR Kedendik baqylaý agenttigi men komitetinde, QR Qarjy ministrliginde basshylyq qyzmetterdi atqarǵan. Qyzylorda, Ońtústik Qazaqstan, Shyǵys Qazaqstan, Aqtóbe oblystarynyń ákimi, ekonomika jáne biýdjettik josparlaý vitse-ministri, eńbek jáne halyqty áleýmettik qorǵaý ministri qyzmetterin atqarǵan. 2019 jylǵy tamyzdan bastap QR Premer-Ministriniń orynbasary laýazymyn atqardy.
