QR Premer-Ministri Asqar Mamin volonterlik qyzmetti qoldaý standartyn ázirleý, óńirlik jol kartalaryn qabyldaý jáne salalyq volonterlikke jaǵdai jasaý jóninde tapsyrmalar berdi, dep habarlaidy "Ult aqparat".
«Volonterlik halyqtyń azamattyq belsendiliginiń mańyzdy nysanyna ainalyp keledi. Volonter jylyn ótkizý nátijesinde volonterlik uiymdar sany - 3 ese, belsendi volonterler sany 4 ese ulǵaidy. Pandemiia kezinde elimizde volonterler 950 myńnan astam azamatqa kómek kórsetti, onyń ishinde gýmanitarlyq kómekti adrestik jetkizý, múgedek adamdarmen, balalarmen jumys júrgizý bar. Volonterlik qozǵalysynyń áleýeti zor jáne naqty paidasy bar. Sondyqtan Memleket basshysynyń bastamasy boiynsha biylǵy jyl volonterlik bastamalardyń jalǵasyna ainaldy», - dep atap ótti A. Mamin Úkimettiń búgingi otyrysynda.
Premer-Ministr qoǵamda ózara kómek jáne qaiyrymdylyq qaǵidattaryn odan ári damytý qajettigin basa aitty jáne elimizde volonterlik qozǵalysty damytý sharalaryn kúsheitý maqsatynda tapsyrmalar berdi.
«Birinshi, Aqparat ministrligi múddeli memlekettik organdarmen birge volonterlik qyzmet máseleleri jónindegi zań jobasynyń sapaly pysyqtalýyn qamtamasyz etip, biylǵy 1 shildege deiin Úkimetke engizsin.
Ekinshi, Aqparat ministrligi sarapshylarmen birge volonterlik qyzmetti qoldaý standartyn ázirlesin. Osy standart negizinde volonterlikti odan ári damytýdyń negizgi baǵyttary boiynsha memlekettik organdarǵa usynymdar ázirlesin.
Úshinshi, memlekettik organdar quqyqtyq jáne psihologiialyq kómek, tarihi-mádeni mura obektilerin saqtaý, tótenshe jaǵdailar saldaryn joiý jáne basqa da salalarda salalyq volonterlik, onyń ishinde tsifrlyq, onlain-volonterlik, ekovolonterlik úshin jaǵdailar jasap, ony jandandyrý qajet.
Tórtinshi, óńirlerdiń ákimdikterine volonterlik qozǵalysty yntalandyrý sharalaryn kúsheitýdi, turaqty monitoring júiesin jolǵa qoiýdy jáne 2023 jylǵa deiingi óńirlik Jol kartalaryn 1 tamyzǵa deiin qabyldaýdy tapsyramyn. Táýelsizdiktiń 30 jyldyǵyn merekeleý sheńberinde volonterlik uiymdarmen birge Jalpyulttyq igi ister marafonyń iske asyrýǵa azamattardy belsendi tartýdy qamtamasyz etý qajet.
Besinshi, Aqparat ministrligi múddeli memlekettik organdarmen jáne Ulttyq volonterlik jelimen birge úzdik volonterlik praktikany nasihattap, barlyq deńgeidegi aqparattyq-túsindirý jumysyn kúsheitý qajet. Adamdar volonterlerdiń árqashan kómekke kelýge daiyn ekenin kórip, bilýi kerek. Eraly Luqpanuly, jalpy baqylaý sizde», - dedi Asqar Mamin.
