QR Premer-Ministri Asqar Maminniń tóraǵalyǵymen ótken Úkimet otyrysynda memlekettiń aldaǵy sý tasqyny kezeńine daiyndyǵy qaraldy, dep habarlaidy "Ult aqparat" primeminister.kz saityna silteme jasap.
Sý tasqynyna qarsy jaǵdai jáne sý tasqyny qaýpiniń aldyn alý men ony joiý boiynsha qabyldanyp jatqan sharalar týraly QR ishki ister ministri E. Turǵymbaev, ózen basseinderindegi gidrotehnikalyq qurylystardyń jai-kúii týraly QR ekologiia, geologiia jáne tabiǵi resýrstar ministri M. Myrzaǵaliev, jol infraqurylymyn daiyndaý týraly QR indýstriia jáne infraqurylymdyq damý birinshi vitse-ministri Q. Óskenbaev, eldi mekenderdi sý basýyna jol bermeý jónindegi sharalar týraly Aqmola oblysynyń ákimi E. Marjyqpaev, Qaraǵandy oblysynyń ákimi J. Qasymbek, Nur-Sultan qalasynyń ákimi A. Kólginov baiandady.
«Qazgidromet» RMK málimetteri boiynsha, osy jyly Qostanai, Aqmola, Qaraǵandy, Soltústik Qazaqstan jáne Aqtóbe oblystarynyń jazyqtyq ózenderiniń, sondai-aq Shyǵys Qazaqstan, Túrkistan jáne Jambyl oblystarynyń taý ózenderiniń basseinderindegi ylǵal qory ortasha kópjyldyq mólsherden joǵary. Shyǵys Qazaqstan, Soltústik Qazaqstan, Qaraǵandy jáne Aqmola oblystarynda sý qoimalarynyń joǵary tolymdylyǵy baiqalady. Respýblika boiynsha 463 gidrotehnikalyq qurylysty jóndeý qajet.
Osy jyldyń sý tasqyny kezeńine daiyndyq maqsatynda 2019 jyldyń kúzinde óńirler 163 shaqyrym qorǵanys bógetterin salý jáne jóndeý, jaǵalaýdy bekitý, túbin tereńdetý, 330 shaqyrym sý tasqyny qaýpi bar ózen arnalaryn túzetý, 116 shaqyrym sý burý arnalaryn ornatý, 2006 shaqyrym arnany, aryqtardy, avtomobil jáne temir jol kópirleri astyndaǵy 10314 birlik sý ótkizý qurylystaryn tazalaý jumystaryn júrgizdi.
Sý tasqynynyń aldyn alý jáne saldaryn joiý úshin 13,5 myń tonna janar-jaǵar mai, 152,6 myń tonna inertti materialdar, 840 myń qum salynǵan qap jáne 47 tonna jarylǵysh zattar qory daiyndaldy, eldi mekenderden 8,8 mln tekshe metrden astam qar shyǵaryldy. Evakýatsiialanǵan halyqty qabyldaityn 1707 pýnkt daiyndaldy, evakýatsiialaý baǵyttary jańartyldy, jalpy sany 9 myń adamnan jáne 1730 birlik tehnikadan turatyn IIM kúshteri men quraldary daiyndaldy. Halyqty habardar etý jáne oqytý jumystary qolǵa alynǵan.
Avtomobil joldarynyń 464 qaýipti ýchaskesi, 66 kópir jáne 852 sý ótkizý qubyry baqylaýǵa alyndy, olarǵa 883 birlik jol-paidalaný tehnikasy bekitilgen. Avtojoldar men jol qurylystaryna kúndelikti patrýldeý jumystary júrgizilýde.
«Boljam boiynsha respýblikanyń ortalyq, soltústik, shyǵys bóliginde qar kóp mólsherde eridi dep kútilýde. Sondyqtan barlyq ákimder búginnen bastap jaǵdaidy kúndelikti baqylaýǵa alýy tiis. Qardy, ásirese, aýyldyq eldi mekenderden shyǵarý úshin barlyq qajetti quraldar men tehnikany jumyldyrý kerek. Ózen arnalaryn, aǵyndardy, nóserli kárizderdi tazartýdy, ýaqytsha jer úiindileri men bógetter salýdy qamtamasyz etý qajet. IIM men Ekologiia, geologiia jáne tabiǵi resýrstar ministrliginiń tiisti qyzmetteri naqty monitoring pen baqylaý jasaýy kerek», — dedi A. Mamin.
Úkimet basshysy Indýstriia jáne infraqurylymdyq damý ministrligine respýblikalyq mańyzy bar avtotrassalar men temir joldardaǵy sý tasqynyn boldyrmaý úshin táýlik boiy baqylaý jasaýdy uiymdastyrýdy, sý ótkizý qubyrlary arqyly tasqyn sýlardy ótkizýdi qamtamasyz etýdi tapsyrdy.
«Ekologiia ministrligi boljamdy málimetterdi eskere otyryp, sý qoimalaryn toltyrýdyń qaýipsiz kólemin anyqtap, olardyń toltyrylýyna turaqty baqylaý jasaýdy qamtamasyz etsin. Qajet bolǵan jaǵdaida sý qoimalaryn aldyn ala bosatý sharalaryn qabyldaý kerek», — dedi A. Mamin.
Premer-Ministr IIM-ge múddeli memlekettik organdarmen jáne óńirlerdiń ákimdikterimen birlesip, tiisti shtabtar qurýdy, kúshter men quraldardyń, onyń ishinde halyqty habardar etý júieleriniń oryn alýy múmkin tótenshe jaǵdailarǵa tolyq daiyndyǵyn qamtamasyz etýdi tapsyrdy.
