QR Premer-Ministri Asqar Mamin QR Tuńǵysh Prezidenti - Elbasy Nursultan Nazarbaev bastamashy bolǵan IID MB, «Qarapaiym zattar ekonomikasy» baǵdarlamalaryn, sondai-aq Memleket basshysy Qasym-Jomart Toqaevtyń Shymkent pen Túrkistan oblysyn áleýmettik-ekonomikalyq damytý boiynsha bergen tapsyrmalaryn iske asyrýdy qamtamasyz etý aiasynda óńirge jumys saparymen bardy.
Shymkent qalasynda Úkimet basshysy «Qazaqstannyń investitsiialyq qory» AQ jáne «Alliance Textile» Ózbek jeńil ónerkásip kásiporyndary qaýymdastyǵynyń birlesken kásiporny - «Alliance» Saýda-ónerkásip palatasy» JShS jip iirý fabrikasynyń ashylý rásimine qatysty.
Joba biyl maýsym aiynda QR jáne ÓR úkimetteriniń arasynda birlesken toqyma klasterin qurý týraly qol jetkizilgen kelisimder aiasynda iske asyryldy. Taraptardyń kúsh-jigeriniń arqasynda qysqa ýaqyt ishinde jóndeý-qalpyna keltirý jumystary júrgizilip, kommýnaldyq qyzmetter tartyldy, bul kóp jyldardan beri jumysy toqtap turǵan fabrikany iske qosýdy qamtamasyz etti.
«Qazaqstan Respýblikasynyń Tuńǵysh Prezidenti – Elbasy Nursultan Ábishuly Nazarbaev bizdiń aldymyzǵa «qarapaiym zattar ekonomikasyn» damytý mindetin qoidy, onda jeńil ónerkásipke erekshe ról beriledi. Biz onyń alǵashqy nátijelerin kórip otyrmyz», - dedi A. Mamin.
Premer-Ministr fabrikany iske qosý Qazaqstannyń toqyma klasterin damytýǵa zor serpin beretinine senim bildirdi.
«Memleket basshysy Qasym-Jomart Kemeluly Toqaev Qazaqstan ekonomikasynyń shikizattyq emes sektorlaryna sheteldik investitsiialardy tartýdyń mańyzdylyǵyn birneshe ret atap ótti. Ózbekstannyń toqyma ónerkásibin damytýdaǵy oń tájiribesin eskere otyryp, biyl 22 maýsymda ótken Qazaqstan men Ózbekstan arasyndaǵy yntymaqtastyq jónindegi Birlesken úkimetaralyq komissiianyń 18-shi otyrysy aiasynda Shymkent qalasynda toqyma klasterin birlesip iske qosý týraly kelisimge qol qoiyldy», - dedi A. Mamin.
Kásiporynda birinshi kezeńde 120 jańa jumys orny qurylǵan. Maqta-talshyqty óńdeý kólemi jylyna 6 myń tonnany quraidy. Jobaǵa ózbek tarapynyń investitsiialary shamamen 4,6 mlrd teńge.
Shymkent qalasynyń toqyma klasterin qalpyna keltirý jónindegi Jol kartasy aiasynda qosymsha eki fabrikany iske qosý josparlanǵan, bul Qazaqstanda óńdeletin maqta kólemin 2 esege arttyrýdy qamtamasyz etedi jáne 800 jańa jumys ornyn qurady.
Túrkistan oblysy Qazyǵurt aýdany Mailyoshaq aýylynda A. Mamin jyldam ázirlenetin tamaq ónimderin óndiretin zaýyttyń ashylý rásimine qatysty.
Álemdegi asa iri jyldam ázirlenetin kespe óndirýshi - «CG Foods Central Asia» kompaniiasy jobaǵa 5,7 mlrd teńge investitsiia saldy jáne 300-ge jýyq qazaqstandyqty jumyspen qamtamasyz etýdi josparlap otyr.
Shyǵarylatyn ónim kólemi jylyna 4,5 myń tonnadan asady. Óndiris protsesinde tek otandyq shikizat paidalanylady. Ónimdi ishki naryqqa ǵana emes, syrtqy naryqtarǵa da jetkizý josparlanǵan.
