QR Premer-Ministri Asqar Mamin Qazaqstanǵa resmi saparmen kelgen Shveitsariianyń Federaldy Prezidenti, Federaldy Qarjy departamentiniń ministri Ýli Maýrermen kelissózder ótkizdi.
«Shveitsariiamen bizdi turaqty áriptestik qarym-qatynastar bailanystyrady. Mundai ózara qarym-qatynastardyń negizin Qazaqstannyń Tuńǵysh Prezidenti – Elbasy Nursultan Nazarbaev qalady. Memleket basshysy Qasym-Jomart Toqaev kópvektorly syrtqy saiasattyń sabaqtastyǵyn saqtaidy jáne ekijaqty yntymaqtastyqty nyǵaitýǵa erekshe mán beredi», — dedi A. Mamin.
Shveitsariia Qazaqstannyń asa iri saýda seriktesteriniń ondyǵyna jáne negizgi investorlarynyń úshtigine kiredi. 2018 jyly taýar ainalymy 3,1 mlrd dollardy, al biylǵy toǵyz aida 1,9 mlrd dollardy qurady. Osy jyldyń birinshi jartyjyldyǵynda kórsetiletin qyzmetter saýdasy ótken jyldyń osyndai kezeńimen salystyrǵanda 40% artty.
2005 jyldan beri Shveitsariia Qazaqstan ekonomikasyna 24 mlrd dollardan astam qarjy investitsiialady. QR-da shveitsariialyq kapitaldyń qatysýymen 324 kompaniia tirkelgen, onyń ishinde «Glencore International AG», «Philip Morris», «Nestle», «Ammann Asphalt GmbH» jáne taǵy basqalary bar. Shveitsariia biznesi aýyl sharýashylyǵynda, kólik jáne qarjy sektorlarynda, taý-ken óndirisi jáne óńdeý ónerkásibinde, kóterme-bólshek saýdada jáne taǵy basqasynda qamtylǵan.
Ekonomikalyq seriktestikti nyǵaitýǵa Qazaqstan – Shveitsariia Iskerlik keńesi jáne saýda-ekonomikalyq yntymaqtastyǵy jónindegi Úkimetaralyq komissiianyń jumysy yqpalyn tigizedi.
«Qazaqstan – Shveitsariianyń Ortalyq Aziiadaǵy mańyzdy seriktesi. Bizdiń ózara is-qimylymyz ekijaqty formatta da, Dúniejúzilik bank pen Halyqaralyq valiýta qory aiasynda da damyp jatyr. Biz ekonomikalyq yntymaqtastyqty keńeitýge jáne birlesken investitsiialyq jobalardy iske asyrýǵa múddelimiz», — dedi Ý. Maýrer.
Shveitsariialyq tarap Qazaqstanda qolaily investitsiialyq ahýaldyń jáne biznesti damytý úshin jaǵdailardyń bar ekenin atap ótti, buǵan Dúniejúzilik banktiń «Doing Business» reitingindegi QR-dyń pozitsiialary dálel bola alady.
Taraptar aýqymdy baǵyttar — saýda-ekonomikalyq, investitsiialyq, tranzittik-kólik, aýyl sharýashylyǵy, aqparattyq-kommýnikatsiialyq, tsifrlyq, týristik, zergerlik salalarda, farmatsevtikada, densaýlyq saqtaý jáne bilim berýde, jasyl ekonomika men sý sharýashylyǵy salasynda, sondai-aq AHQO, Dúniejúzilik bank, HVQ, DSU boiynsha yntymaqtastyq perspektivalaryn talqylady.
Shveitsariianyń Federaldy Prezidenti Ý. Maýrerdiń Qazaqstanǵa resmi saparynyń aiasynda Qazaqstannyń Tuńǵysh Prezidenti – Elbasy N. Nazarbaevpen kelissózder sondai-aq, eki eldiń iskerlik ortalarynyń ókilderiniń qatysýymen dóńgelek ústel otyrysyn ótkizý josparlanǵan.
Buǵan deiin habarlaǵanymyzda, osy ýaqytta Nur-Sultan qalasynda Memleket basshysy Q.Toqaev pen Ý. Maýrerdiń kezdesýi ótip jatyr.
