QR Premer-Ministri Asqar Mamin Óskemendegi jańa kópbeiindi balalar aýrýhanasyna bardy, dep habarlaidy "Ult aqparat".
Óskemendegi 200 tósek-oryndyq kópbeiindi balalar aýrýhanasy aýmaqtardy damytý baǵdarlamasy aiasynda salyndy. Bul sońǵy 10 jylda boi kótergen ShQO-nyń eń iri densaýlyq saqtaý nysandarynyń biri.
Meditsinalyq nysan Ana men bala densaýlyǵyn saqtaý biryńǵai qyzmetiniń bir bóligine ainalyp, Ana men bala ortalyǵy bazasynda qazirgi pediatriialyq blokty almastyrady. Onyń qurylymyna pediatriia, nevrologiia, neirohirýrgiia, travmatologiia-ortopediia, hirýrgiia bólimsheleri, sondai-aq kúrdeli somatika, lor, kóz mikrohirýrgiiasy, jansaqtaý bólimi jáne bes zamanaýi operatsiialyq blok kirdi. Keń etip salynǵan qabyldaý bólimi TRIAGE-júiesi qaǵidasyna sáikes keledi. Bul meditsinalyq kómek kórsetýdiń kezek kúttirmeitin basymdyǵy boiynsha shuǵyl kelip túsken naýqastardy saralaýǵa múmkindik beredi.
Jańa aýrýhana balalardy ońaltý qyzmetin jańa deńgeide damytýǵa múmkindik beredi. QR Tuńǵysh Prezidenti qorynyń bastamasymen jáne qoldaýymen «Qamqorlyq» baǵdarlamasynyń jol kartasy aiasynda 50 oryndyq balalardy ońaltý bólimshesi jumys isteidi. Kishkentai naýqastar oblystan tys jerge barmai-aq, joǵary bilikti ońaltý kómegi men em alady.
«Mundaǵy biregei jabdyqtyń quny - 5 milliard teńge. Ony Londonda, Izrailde, Eýropanyń iri elderinde qoldanady. Bul - zamanaýi kompiýterlik tomograf, sońǵy úlgidegi sandyq rentgen-apparaty, narkoz-tynys alý, endoskopiialyq hirýrgiiaǵa arnalǵan 3D-beine júiesi, bas miyn zertteýge arnalǵan kópfýnktsionaldy kompiýterlik keshen. Munyń barlyǵy bizdiń sapaly meditsinalyq kómek kórsetýimizge, onyń qoljetimdiligin arttyrýǵa múmkindik beredi. Eski ǵimaratta balalar jáne eresekter emhanasy, áielder konsýltatsiiasy keńeimek. Ol balalar men eresekterdiń diagnostikalyq ortalyǵy bolady», - dep atap ótti Ermek Omarbekov.
Jańa aýrýhanada 500 qyzmetker jumys isteidi. Sońǵy úsh jylda Ana men bala ortalyǵynyń 400 dárigeri úsh deńgeili bilim berý óńirlik baǵdarlamasy boiynsha biliktiligin arttyryp, álemniń jetekshi klinikalarynda qaita daiarlaýdan ótti.
Asqar Mamin oblystyq balalar aýrýhanasyna baryp, jansaqtaý jáne operatsiialyq bloktardyń jumysymen tanysty. Premer-Ministrge SOVID-19 emdeý úshin immýndyq plazma bólý jónindegi ǵylymi joba, sondai-aq jeke qorǵaný quraldarynyń úlgileri kórsetildi. Olar QHR-diń «San Bao Shyńjań saýda-ónerkásip korporatsiiasy» JShS-dan ákelingen.
