Jumyspen qamtýdyń jol kartasy aiasynda iske asatyn infraqurylymdyq jobalar turaqty jumys oryndaryn qurýǵa baǵyttalýy kerek. Premer-Ministr Asqar Mamin Úkimet otyrysynda salaǵa jaýapty vedomstvoǵa osyndai mindet júktedi, dep habarlaidy "Ult aqparat".
Úkimet basshysy byltyr jumyspen qamtýdyń jol kartasy jumyssyzdyqpen kúreste jáne halyqtyń ál-aýqatyn jaqsartý isinde joǵary tiimdilik kórsetkenin atap ótti.
«Memleket basshysy Qasym-Jomart Toqaevtyń tapsyrmasy boiynsha Jumyspen qamtýdyń jol kartasyn keńeitý jóninde sharalar qabyldandy. Sondyqtan, biyl jol kartasyn oryndaý sheńberinde infraqurylymdyq jobalardy iske asyrýǵa kásipkerlik pen agrarlyq salany damytý arqyly turaqty jumys oryndaryn qurýǵa erekshe nazar aýdarylady. Sonyń ishinde óńirlerdegi joldardy, meditsina jáne bilim berý uiymdaryn salý jáne jóndeýge baǵyttalǵan 127,5 mlrd teńgeni quraityn infraqurylymdyq jobalar iske asyrylady», - dedi Asqar Mamin.
Sondai-aq, biznesti qoldaýǵa bólinetin qarajattyń basym bóligi óńirlerge baǵyttalatynyn aitty.
«Atameken» palatasy men ákimdikter qatysatyn mikroqarjylyq uiymdar arqyly 22,5 mlrd teńge kóleminde biznes jobalardy qarjylandyrý josparlanǵan. Óńirlerde kásipkerlikti damytýǵa 50 mlrd teńge baǵyttalady», - dedi Premer-Ministr.
