QR Premer-Ministri Asqar Mamin Nur-Sultan qalasynda ModeX úi qurylysy kombinatynyń avtomattandyrylǵan konveierlik jelisiniń resmi ashylýyna qatysty, dep habarlaidy "Ult aqparat" QR Úkimetiniń resmi saityna silteme jasap.
Kásiporynda qurylys merzimin qysqartýǵa, onyń sapasyn arttyrýǵa jáne turǵyn úidiń ózindik qunyn tómendetýge múmkindik beretin, AQSh, Singapýr jáne Germaniiada qoldanylatyn iri blokty úi qurylysynyń innovatsiialyq tehnologiialary engizilgen.
Modýldik bloktar turǵyn úi keshenderin, kottedjderdi, áleýmettik infraqurylym obektilerin, onyń ishinde oqý oryndaryn, saýda pavilondaryn, qyzmettik úi-jailardy jáne t. b. salýda da paidalanylady. Iri blokty úi qurylysy klimattyq jaǵdailarǵa táýeldi emes, óitkeni jumystyń 80%-y — armatýra bailamynan bastap taza árleýde modýlderdi qalyptastyrýǵa deiin kásiporynda júzege asyrylady, bul barlyq protsesterdi edáýir jyldamdatady. Máselen, bolashaqta 16 qabatty turǵyn úidi salý úshin tek tórt ai ýaqyt qajet bolady. Modýlderdi óndirýge qajetti negizgi material — keramzitbeton.
Kásiporynnyń temirbeton ónimi «QazQSǴZI» AQ-nyń joǵary beriktigi men uzaq merzimdiligine jasalǵan synaǵynan sátti ótti. Kópsatyly operatsiialyq baqylaýdyń jáne avtomattandyrýdyń joǵary deńgeiiniń arqasynda joǵary sapaly ónimge qol jetkiziledi.
BI Group qurylys holdinginiń enshiles kásiporny – úi qurylysy kombinatynyń jobalyq qýaty jylyna 200 myń sharshy metr turǵyn úidi quraidy. 2023 jylǵa deiin jalpy jobalyq qýaty 500 myń sharshy metr turǵyn úidiń úsh kezegin salý kózdelgen. Kombinat 1 myńnan astam jumys ornyn ashady.
Aldaǵy ýaqytta Almaty men Shymkentte iri blokty úi qurylysy zaýyttaryn ashý josparda bar.
«Iri blokty úi qurylysy Qazaqstannyń qurylys salasyn damytýǵa serpin beredi jáne elimizdiń turǵyn úi jáne áleýmettik infraqurylymyn salý kólemin keńeitý jónindegi mindetterdi sheshýge yqpal etedi», - dedi A. Mamin.
Is-sharaǵa Premer-Ministrdiń orynbasary R. Skliar, Nur-Sultan qalasynyń ákimi A. Kólginov, indýstriia jáne infraqurylymdyq damý ministri B. Atamqulov, bilim jáne ǵylym ministri A. Aimaǵambetov qatysty.
