Búgin Premer-Ministr Asqar Maminniń tóraǵalyǵymen ótken QR Úkimetiniń otyrysynda ulttyq ekonomika, indýstriia jáne infraqurylymdyq damý ministrleriniń, sondai-aq birqatar oblystardyń ákimderiniń «Nurly jol» memlekettik infraqurylymdyq damý baǵdarlamasynyń iske asyrylý barysy týraly baiandamalary tyńdaldy, dep habarlaidy "Ult aqparat" primeminister.kz portalyna silteme jasap.
Biyl 2015–2019 jyldarǵa arnalǵan «Nurly jol» memlekettik baǵdarlamasyn iske asyrýdyń birinshi kezeńi aiaqtalady. A. Mamin baǵdarlamany iske asyrý Qazaqstannyń tranzittik áleýetiniń, sonymen qatar, injenerlik infraqurylymynyń damýyna úlken úles qosqanyn atap ótti. Bul kezeńde 8 myń shaqyrym avtojol, 3 shaqyrym jylýmen jáne sýmen jabdyqtaý jelileri salynyp, rekonstrýktsiialandy, 1776 shaqyrym bolatyn Soltústik–Ońtústik elektr berý jelileriniń úshinshi jelisi paidalanýǵa berildi
«Baǵdarlamanyń asa mańyzdy mindeti – halyqtyń turmys sapasyn arttyrý. Jańa joldar salý júk tasymaldaý kezinde biznes úshin kóliktik shyǵandardy keminde 15%-ǵa qysqartýǵa múmkindik beredi. Nátijesinde, bul ózindik qunyna jáne tutynýshylar úshin túpki baǵasyna yqpalyn tigizedi», — dedi Asqar Mamin.
Ótken jyldyń ózinde ǵana 86 myńnan astam jumys orny qurylǵanyn aita ketken jón. Biyl josparǵa sáikes taǵy 54 myń jumys ornyn qurý kózdelgen.
Sonymen qatar, baǵdarlamany iske asyrý eldiń kóliktik áleýetin damytýǵa úlken serpin berdi. Ótken jyldyń ózinde ǵana tranzitten túsken kiris $1,5 mlrd qurady. Al tranzitten qosymsha tabys alý maqsatynda osy jyldan bastap, Astana — Shýchinsk jolynan bólek, 471 shaqyrym aqyly jol paidalanýǵa berildi. Onyń ishinde Astana — Temirtaý, Almaty — Qapshaǵai, Almaty — Qorǵas joldary bar. 2020 jyly 5,5 myń aqyly jol iske qosylady.
Premer-Ministr ekonomikanyń damýyna úlken úles qosqan jáne uzaq merzimdi oń áser tigizgen jobalardyń biri «Batys Eýropa — Batys Qytai» jobasy bolǵanyny atap ótti, onyń aiasynda 47 jańa óndiris pen 73 qyzmet kórsetý nysany quryldy. Jobany iske asyrýdyń ortasha jyldyq jiyntyq tiimdiligi 200 mlrd teńgeni quraidy.
«Baǵdarlama aiaqtalatyn biylǵy jylǵa da úlken josparlar bar. Respýblikalyq mańyzy bar 4,4 shaqyrym jol rekonstrýktsiialanyp, 5 myń shaqyrym jergilikti jol jóndeledi. Osyǵan orai, memlekettik organdar, qurylys kompaniialary belgilengen josparlardy oryndaý úshin qarqyndy jumys atqarýy tiis», — dedi Asqar Mamin.
Indýstriia jáne infraqurylymdyq damý ministrligine «Nurly jol» baǵdarlamasynyń 2020–2025 jyldarǵa arnalǵan kelesi kezeńin ázirleýdi tezdetý tapsyryldy. Osy aida baǵdarlamanyń tujyrymdamasyn usyný qajet.
