QR Premer-Ministri Asqar Maminniń tóraǵalyǵymen ótken Úkimet otyrysynda áleýmettik mańyzy bar taýarlarǵa baǵany retteý jáne azyq-túlikpen qamtamasyz etý máseleleri qaraldy, dep habarlaidy primeminister.kz saity.
Baǵaǵa monitoring júrgizý jáne qabyldanǵan sharalar týraly saýda jáne integratsiia ministri B. Sultanov, azyq-túlikpen qamtamasyz etý týraly aýyl sharýashylyǵy ministri S. Omarov, óńirlerdegi ahýal týraly Aqmola oblysynyń ákimi E. Marjyqpaev, Soltústik Qazaqstan oblysynyń ákimi Q. Aqsaqalov, Nur-Sultan qalasynyń ákimi A. Kólginov baiandady.
Biyl qalyptasqan jaǵdaida Úkimet pen ákimdikter ónim óndirýdi, saqtaýdy jáne barlyq óńirlerge jetkizýdi qamtamasyz etý boiynsha sharalar keshenin qabyldady. Áleýmettik mańyzy bar taýarlardyń shekti baǵasy belgilendi, baǵany tejeý mindettemesimen «qaitarymdy shema» arqyly saýda jelilerine jeńildikti qaryz berý praktikasy keńeitildi. Aýyl sharýashylyǵy taýaryn óndirýshilerge memlekettik qoldaý sharalary kórsetildi, onyń ishinde forvardtyq satyp alý mehanizmi engizildi – 24,5 mlrd teńge bólindi, 516,9 myń tonna aýyl sharýashylyǵy ónimin satyp alý úshin 159 aýyl sharýashylyǵy taýaryn óndirýshi irikteldi.
Premer-Ministr qabyldanǵan sharalardyń áleýmettik mańyzy bar taýarlardyń baǵasyn 4,4% deńgeiinde turaqtandyrýǵa múmkindik bergenin atap ótti, bul ótken jylǵy kórsetkishterden eki ese az (8,7%). Úkimet basshysy baǵany turaqtandyrý boiynsha Almaty qalasyn mysalǵa keltirdi, munda «qaitarymdy shema» úshin jedel túrde qarajat bólý jumystary júrgizildi, bul turaqtandyrý qorlaryn der kezinde tolyqtyrýǵa, satyp alynatyn áleýmettik mańyzy bar taýarlardyń tizimin keńeitýge múmkindik berdi.
«Ákimdikter aldyn alý sharalaryn der kezinde qabyldasa, baǵanyń turaqtylyǵy men ony tejeý qamtamasyz etiledi. Biz importqa táýeldilikti azaitý úshin jumys jasap jatyrmyz. Baǵany qymbattatýǵa eshbir sebep joq. Áleýmettik mańyzy bar taýarlardyń barlyq túrleri boiynsha baǵanyń turaqtylyǵyna qatań baqylaý qamtamasyz etiledi», — dedi A. Mamin.
Úkimet basshysy Aýyl sharýashylyǵy ministrligine ákimdiktermen birlesip, syrtqy jaǵdaiǵa jáne azyq-túlik qorynyń jetkilikti bolýy men áleýmettik mańyzy bar taýarlar baǵasynyń turaqtylyǵyna monitoringti jalǵastyrýdy, «qaitarymdy shema» arqyly saýda jelilerine jeńildikti qaryz berýdi keńeitý, sondai-aq áleýmettik mańyzy bar taýarlar baǵasynyń turaqtylyǵyn qamtamasyz etý úshin forvardtyq satyp alý praktikasy máselelerin pysyqtaýdy tapsyrdy.
Ákimdikterge importqa táýeldi taýarlar (qant, kókónis ónimderi jáne basqalary) óndirisin ulǵaitý boiynsha jobalardy basym retpen iske asyrýdy qamtamasyz etý tapsyryldy.
Premer-Ministr Aýyl sharýashylyǵy ministrligi men óńirler ákimderiniń nazaryn ózimizde óndiriletin azyq-túliktiń, ásirese, kartop, un, sábiz jáne qaraqumyq jarmasynyń baǵasyn ósirýge jol bermeýi tiis ekenine aýdardy.
«Azyq-túliktiń qoljetimdiligi men sapasyn qamtamasyz etý qazaqstandyqtardyń turmys sapasynyń basty faktorlarynyń biri», — dedi A. Mamin.
