Búgingi Úkimet otyrysynda «Nurly jer» jáne 7-20-25 baǵdarlamalarynyń iske asyrylý barysy qaraldy. Indýstriia jáne infraqurylymdyq damý ministri R. Skliar, «Baspana» ipotekalyq uiymynyń basqarma tóraǵasy Q. Altynbekov sóz sóilep, sonymen qatar memlekettik baǵdarlama kórsetkishterine qol jetkizbegen Pavlodar jáne Batys Qazaqstan oblystarynyń ákimderi tyńdaldy, dep habarlaidy "Ult aqparat" primeminister.kz portalyna silteme jasap.
«Nurly jer» jáne «7-20-25» baǵdarlamalary – halyqtyń turǵyn úi jaǵdaiyn jaqsartý jónindegi Memleket basshysynyń áleýmettik saiasatynyń negizi», — dep QR Premer-Ministri A. Mamin, kelesi baǵyttar boiynsha sharalar qabyldaý kerektigin atap ótti.
Birinshi. Turǵyn úi qurylysyn odan ári damytý.
«Biyl biz 13,1 mln sharshy metr páterdi paidalanýǵa berýimiz kerek. Ákimdikter jáne tiisti memlekettik organdar jer telimderin bólý, injenerlik-kommýnaldyq infraqurylymdy salý, sonymen qatar investitsiialyq turǵyn úi jobalaryn súiemeldeý boiynsha jumys qarqynyn arttyrýy qajet», — dedi A. Mamin.
Sonymen qatar, Prezident tapsyrmasyna sáikes jeke turǵyn úi qurylysynda ortaq arhitektýralyq kelbetti saqtaý kerek. Premer-Ministr atap ótkendei, bul tapsyrma tek úsh óńirde: Aqtóbe, Soltústik Qazaqstan jáne Qostanai oblystarynda oryndalǵan. Al qalǵan óńirlerde bul baǵytta jumys endi bastalýda. Sondyqtan da, osy jumystyń qarqynyn arttyrýdy tapsyrdy.
Ekinshi. Memleket basshysynyń tapsyrmasy boiynsha «Nurly jer» baǵdarlamasyna ózgerister engizý.
Elbasynyń áleýmettik qamqorlyq sharalaryn iske asyrý aiasynda 5 jyldyń ishinde, jyl saiyn 6 myńǵa jýyq kóp balaly otbasy úimen qamtamasyz etiledi.
«1 mamyrdan bastap páter bólýdi bastaimyz. Turǵyn úi qurylys jinaq banki arqyly jeńildikti zaim boiynsha 22,5 myń otbasy baspana alady», — dedi A. Mamin.
Bul tetik zańnamalyq aktilerge ózgerister engizilgen soń iske qosylatyny atap ótildi.
Úshinshi. Qurylystaǵy otandyq úlesti 90 paiyzǵa deiin ulǵaitý.
Úkimettiń keńeitilgen otyrysynda Elbasy qurylystaǵy otandyq úlesti ulǵaitý mindetin qoidy. Otandyq qurylys materialdaryn shyǵarý qarapaiym zattar ekonomikasy baǵdarlamasynyń arnaiy baǵyty bolyp tabylady. Onyń oryndalýyna 600 mlrd teńge kóleminde qarajat bólinip otyr.
«Bul úshin jeńildikti qarjylandyrý men memlekettik qoldaý sharalary kózdelgen. Osy baǵytta jańa jobalardy damytý kerek, — dedi Premer-Ministr. — Jergilikti ónimdi paidalaný ekonomikanyń basqa salalaryna mýltiplikativti áser etedi, jumys oryndaryn qurýǵa múmkindik beredi».
Mysaly, Túrkistan qalasynda aýqymdy qurylys júrip jatyr, dep atap ótti A. Mamin, osy jerde qurylys materialdaryn shyǵarý boiynsha jobalar júzege asyrylýy qajet. Jalpy, osyndai óndiristerdi barlyq óńirlerde qurý tapsyryldy.
