Qazaqstan premer-ministri Asqar Mamin Úkimet otyrysyn ótkizdi. Onda ulttyq halyq sanaǵynyń aldyn ala qorytyndysy qaraldy, - dep habarlaidy "Ult aqparat" Primeminister.kz saityna silteme jasap.
Qazaqstan Strategiialyq josparlaý jáne reformalar agenttiginiń Ulttyq statistika biýrosynyń basshysy Nurbolat Aidapkelov halyq sanaǵyn ótkizý jónindegi jumystyń aiaqtalǵany týraly baiandady.
Ulttyq statistika biýrosy málimetinshe, halyqtyń 60 paiyzǵa jýyǵyna dástúrli sanaq júrgizilgen. Elimizde tuńǵysh ret halyq sanaǵy elektron túrde ótkizildi. Halyqtyń 40 paiyzdan astamy sanaqqa sanaq.gov.kz saitynda elektron sanaq paraqtaryn ózderi toltyrý arqyly qatysqan.
Halyq sanaǵyna sanaq personalynyń 25 myńǵa jýyq adamy, sondai-aq Ulttyq statistika biýrosynyń aýmaqtyq bólimsheleri men ortalyq apparatynyń qyzmetkerleri qatysty. Aldyn ala qorytyndysy barlyq tekserý aiaqtalǵannan keiin jeltoqsannyń aiaǵynda shyǵarylady.
Úkimet basshysy kúrdeli epidemiologiialyq jaǵdailarda ótken ulttyq halyq sanaǵy meilinshe sapaly uiymdastyrylǵanyn aitty.
"Premer-ministr qazaqstandyqtarǵa osy mańyzdy naýqanǵa belsendi qatysqany úshin, sondai-aq Ulttyq statistika biýrosynyń qyzmetkerleri men osy naýqanǵa jumyldyrylǵan azamattarǵa atqarǵan jumysy úshin alǵys bildirdi", - delingen úkimet basshysy saitynda.
