Kásiporyndarda eńbek daýynyń paida bolýyna bes faktor sebep bola alady. Bul týraly oblys ákimi Erlan Qoshanov QR vitse-premeri Asqar Maminniń tóraǵalyǵymen ótken seminar-jinalysta atap ótti, dep habarlaidy óńir basshysynyń resmi saity.
Seminar-jinalystyń taqyryby «Kompaniianyń áleýmettik saiasaty: tájiribe jáne damý áleýeti» boldy. Otyrys barysynda jalaqyny kóterý, jumys oryndaryndaǵy qaýipsizdik jáne eńbek zańnamasynyń talaptaryn oryndaý týraly áńgime qozǵaldy.
- Elbasy Joldaýynda eńbekaqyny bir jarym ese ulǵaitý boiynsha sharalar qoldanýǵa tapsyrmalar berildi. Bul eń tómengi eńbekaqy kólemine jáne tómen jalaqy alatyn jumyskerlerdiń ailyq aqysyn kóterýge qatysty aitylǵan sózder. ERG, KAZMinerals jáne ArcelorMittal Temirtau sekildi kompaniialary 2019 jyldyń 1 qańtarynan bastap qyzmetkerlerdiń eńbekaqysy kóteriletini týraly málimdegen. Ol tabysy 25 AEK tómen eki millionnan astam jumyskerlerge qatysty júzege asyrylady, - dedi óz sózinde Asqar Mamin.
Ol sonymen qatar eńbek daýy paida bolýynyń aldyn alý máselesin kóterdi. Bul maqsatta úkimette arnaiy karta qurylǵan. Oǵan osyndai shielenis oryn alý qaýpi anaǵurlym joǵary birneshe aimaqtar engizilgen. Atalmysh tizimde Qaraǵandy oblysy da bar. Aimaqta eńbek daýynyń aldyn alý úshin qandai sharalar qoldanylyp jatqany týraly vitse-premerge Qaraǵandy oblysynyń ákimi Erlan Qoshanov baiandady.
- Biz áleýmettik saýalnama ótkizdik, jáne de eńbek daýynyń paida bolýyna yqpal etetin bes faktordy anyqtadyq. Ol - naqty eńbek shartyna jáne jumys kólemine sai kelmeitin nemese tómen jalaqy kólemi; jumys berýshi men jumysker arasynda qurylymdyq dialogtyń joqtyǵy; sáikes kelmeitin jaǵdai, eńbek qorǵaýy jáne qaýipsizdiginiń tómen deńgeii; tiimdi emes kadrlyq saiasat; kásiporyndardyń álsiz áleýmettik baǵyttary - tómen turmystyq jaǵdai jáne bos ýaqyttyń uiymdastyrylmaǵandyǵy, - dep tizip shyqty Erlan Qoshanov. «Qazir osy pýnktterdiń árqaisysy boiynsha jumystar jasalyp jatyr. Oblystyń kóptegen kompaniialarymen memorandýmdarǵa qol qoiylǵan, osy kelisimderge sai 2019 jyly olardyń qyzmetkerleriniń eńbekaqysy kóteriletin bolady».
Al jumys berýshiler men jumyskerler úshin dialogtyq alań qurýǵa keler bolsaq, bul rette ár kásiporyn óz tásilderin izdestirýde.
- Mysaly, «Qazaqmys» rýdnikterinde óz-ózine qyzmet kórsetý interaktivti beketteri engizildi, olar ujymdaǵy jaidy qadaǵalaýǵa septigin tigizetin ádis retinde qarastyrylady. Ár qyzmetker elektrondyq terminal kómegimen jasyryn nemese ashyq túrde problemalary týraly aityp, usynystaryn bildire alady. Ol óz kezeginde basshylyqqa naqty jaǵdaidy kórip, shuǵyl túrde oǵan áreket jasaýǵa kómegin tigizedi. Keibir jaittarda biz dialog qurýdyń basqa tásilderin qoldanamyz. Osylaisha, «ArselorMittal Temirtaý» Kómir departamentinde únemi qyzmet etetin jumys toby qurylǵan. Onyń quramyna Kómir departamenti shahtalarynyń barlyq basshylary, kásipodaq jetekshileri jáne eń bastysy - ár eńbek ujymy atynan jiberilgen kenshilerdiń ókilderi engizilgen, - dep atap ótti Erlan Qoshanov. Buǵan qosa, jumys berýshiler men jumyskerler arasynda daýly jaittardy sheshý úshin oblysta Tatýlastyrý ortalyǵy qurylǵan, oǵan daýlasýshy jaqtar kómekke júginý úshin kele alady. Eki aida onda 71 ótinish tirkelgen.
Aimaq basshysy óz baiandamasynda sonymen qatar iri kompaniialardyń kadrlyq saiasatyna qatysty másele qozǵady. Onyń aitýynsha, atalmysh kásiporyndarda negizgi laýazymdarǵa sheteldik azamattar taǵaiyndalady.
- Aýtstaffing júiesi, bizdiń pikirimizshe, zańnamalyq deńgeide retteýdi qajet etedi. Sondai-aq nazar aýdarýdy talap etetin taǵy bir másele - deńgeii sai keletin jergilikti mamandar bola tura, sheteldik qyzmetkerlerdiń tartylýy. Turaqtylyqty saqtap qalý úshin jáne tiimdi basqarý úshin jergilikti kadrlyq áleýetti qoldanǵan, óz mamandarymyzdy daiarlaý, jergilikti tájiribeli qyzmetkerlerden basshylardy daiyndaýdyń mańyzy zor. Osy maqsatta búginnen bastap-aq oblysymyzdyń JOO men kolledjderi iri kompaniialardyń tapsyrysy boiynsha mamandardy daiarlap jatyr. Ol túlekterdiń jumyspen qamtylýyna kepildik beredi, - dedi ol.
Asqar Mamin óz kezeginde aýqymdy tsifrlandyrýdyń arqasynda 2030 jylǵa qarai kásiporyndarda adamdar atqaryp jatqan jumystardyń 45% avtomattandyrylatyn atap aitty. Osylaisha, 2025 jyly aldyn ala esepteýler boiynsha 5 myńǵa jýyq jumyskerlerge suranys joǵalady.
Bul problemany sheshý maqsatynda Qaraǵandy oblysynda qazirden bastap sharalar qoldanylyp jatyr.
- Búgingi tańda 86 iri kásiporyndar jumys resýrstarynyń basqa salaǵa baǵyttalýy boiynsha Jol kartasyn qurdy. Ol úshin biz «Atameken» aimaqtyq kásipkerler palatasymen birlesip, kadrlyq suranysty baqylaý jáne boljaý ortalyǵyn quryp jatyrmyz. Sondai-aq aldaǵy úsh jylda 27 jańa investitsiialyq jobalardy iske qosýdyń arqasynda 9000 jumys oryndary qurylady, - dedi Erlan Qoshanov.
