QR Premer-Ministri Asqar Maminniń tóraǵalyǵymen ótken Investitsiialyq ahýaldy jaqsartý jónindegi keńestiń (IAJK) otyrysynda Dúniejúzilik saýda uiymy (DSU) men Ekonomikalyq yntymaqtastyq jáne damý uiymynyń (EYDU) talaptaryna sáikes Qazaqstan ekonomikasyndaǵy básekelestik ortany damytý máseleleri qaraldy, dep habarlaidy "Ult aqparat" primeminister.kz saityna silteme jasap.
QR ulttyq ekonomika ministri R. Dálenov, sonymen birge AQSh-tyń Qazaqstanda tirkelgen elshisi Ý. Mozer, Ulybritaniia elshisi – M. Gifford, Kanada elshisi – N. Brýsso, Eýropalyq Odaq elshisi – Sven-Olov Karlsson, Kanada Premer-Ministriniń EO men Eýropadaǵy arnaiy elshisi S. Dion, EYDU ókilderi, «Ernst & Young» konsaltingtik kompaniiasynyń ókilderi jáne t.b. Qazaqstandaǵy ekonomikalyq básekelestikti damytýdyń qazirgi jaǵdaiy men perspektivalary týraly, sondai-aq, atalǵan saladaǵy saiasatty jetildirý jónindegi usynystarymen baiandama jasady.
«Qazaqstannyń Tuńǵysh Prezidenti – Elbasy N. Nazarbaev jáne Memleket basshysy Q. Toqaev básekeli orta men monopoliiaǵa qarsy zańnamanyń damýyn ekonomikalyq saiasattyń basym baǵyttarynyń biri retinde qarastyrady», — dedi A. Mamin.
Qazaqstan qabyldap jatqan básekelestikti jáne iskerlik ahýaldy damytý boiynsha sharalar biylǵy 10 aida el ekonomikasynyń 4,4%-ǵa ósýine, sondai-aq, Qazaqstannyń EQQDB, HVQ, ADB, Dúniejúzilik bank jáne Dúniejúzilik ekonomikalyq forým reitingterindegi pozitsiialarynyń kóterilýine yqpal etti. Qazaqstannyń EYDU Básekelestik jónindegi komitettegi statýsyn arttyrý máselesi qaralyp jatyr.
Úkimet basshysy memlekettiń ekonomikadaǵy rólin tómendetý maqsatynda, osy jyldyń sońyna qarai memleket qatysýymen kompaniialardyń qatysýǵa ruqsat etiletin qyzmet túrleriniń sany 30%-dan astamǵa – 347-den 240-qa deiin azaiatynyn atap ótti.
Premer-Ministr 2016–2020 jyldarǵa arnalǵan Jekeshelendirýdiń keshendi josparyndaǵy 864 aktivten qazirgi kezde 500-ge jýyǵy jekeshelendirilgenin aitty, bul infraqurylymdy basqarýdyń ónimdiligi men tiimdiligin, qurylys, taý-ken óndirisi, aýyl sharýashylyǵy, óńdeý jáne basqa da salalarda menedjmentti arttyrýǵa múmkindik berdi.
Úkimet basshysy Qazaqstannyń ekonomikalyq saiasatynyń basymdyqtarynyń biri — shaǵyn jáne orta biznesti damytý ekenin atap ótti.
«2005 jyldan 2018 jyl aralyǵynda el ekonomikasyndaǵy ShOB úlesi úsh esege jýyq – 10,5%-dan 28,4%-ǵa deiin ósti. 2025 jylǵa qarai biz bul kórsetkishti 35%-ǵa deiin jetkizýdi josparlap otyrmyz. Qoiylǵan maqsattarǵa qol jetkizý úshin kóp jumystar atqarýymyz kerek», — dedi Premer-Ministr.
