QR Premer-Ministri Asqar Mamin Nur-Sultan qalasynda BINOM jáne Quantum STEM School innovatsiialyq mektepteriniń ashylýyna qatysty, dep habarlaidy "Ult aqparat" Úkimet basshysynyń resmi saityna silteme jasap.
BINOM School – qazaqstandyq jalpy bilim berý úderisine ozyq ádistemelerdi engizetin jańa brend. 2021-2022 jyldary elordada osy formattaǵy 6 mektep ashylady. Árbir oqý orny eki aýysymda 4 myń oqýshyǵa shaqtalǵan. Oqytý otandyq model men Finliandiia, Ulybritaniia jáne Ońtústik Koreianyń aldyńǵy qatarly halyqaralyq júieleri negizinde uiymdastyrylǵan. Jobany BI Group holdingi Nur-Sultan qalasynyń ákimdigimen birlesip memlekettik-jekeshelik áriptestik qaǵidaty boiynsha júzege asyryp jatyr.
Aýdany 22 myń sharshy metrden astam árbir BINOM mektebinde 127 kabinet, fizika, himiia, biologiia, nano- jáne biotehnologiia boiynsha 9 keńeitilgen zerthana, 100 oryndyq kinozal, muǵalimder men balalarǵa arnalǵan kovorking-aimaqtar, telestýdiia, oiyn bólmeleri, smart-synyptar, shyǵarmashylyq eksperimentterge arnalǵan 3D-printer, robotty tehnika kabinetteri, metall jáne aǵash oiý sheberhanalary, Speaking Club, TedxBinom, sondai-aq qazaqstandyq jáne sheteldik jazýshylardyń 5 myńnan astam tanymal basylymdary jinaqtalǵan kitaphana bar. Sonymen qatar erekshe bilim alý qajettiligi bar balalar úshin yńǵaily bilim berý ortasy jasalǵan: júrip-turýy shekteýli oqýshylarǵa arnalǵan liftiler, pandýstar, kótergishter, biiktigi retteletin ústelder men partalar, taktildi jolaqtar jáne t. b.
Úkimet basshysy mektep oqytýshylarymen kezdesti. BINOM mektebine muǵalimderdi irikteý Jumys Smart Nation iri internet-platformasynda ótti. Eki kezeńdik konkýrstyq irikteýdiń nátijeleri boiynsha mektepke respýblika óńirlerinen 300 pedagog qabyldandy. Elordada ashylǵan Quantum STEM School jekemenshik jelisiniń alǵashqy innovatsiialyq mektebi 1020 orynǵa arnalǵan. Mektep matematika, ǵylym jáne injeneriia pánderin tereńdetip oqytatyn Singapýr men AQSh-tyń úzdik oqý ádistemeleriniń ozyq tájiribesine negizdelgen. Munda oqýshylar jalpy bilim berý pánderimen qatar, integratsiialanǵan injenerlik baǵdarlama (Integrated Engineering Program), sporttyq baǵdarlamalaý, aviamodeldeý jáne t. b. kýrstaryn meńgeredi. Aldaǵy jyldary búkil el boiynsha 20 Quantum STEM School salý josparda bar.
«Memlekettik-jekeshelik áriptestik modeli boiynsha innovatsiialyq oqý oryndaryn salýdy arttyp, jekemenshik mektepter jelisin damytý qajet. Biznespen birlesip iske asyrylǵan ozyq oqý oryndaryn qurý jobalary orta bilim berýdiń jańa standarttaryn qalyptastyrýǵa úlgi bolady», — dedi Mamin.
«Nur Otan» partiiasynyń sailaýaldy baǵdarlamasyn iske asyrý aiasynda 2021 jyldan bastap 2025 jylǵa deiingi kezeńde elimizde 800 jańa mektep paidalanýǵa beriledi. Biyl 200 mektepti paidalanýǵa berý josparlanǵan, onyń ishinde maqsatty qurylys esebinen – 163 mektep, MJÁ tetigi esebinen – 6 mektep, jekemenshik mektepter jelisin damytý esebinen – 31 mektep. Osy jyly 200 mekteptiń ashylýy basym tártippen apatty mektepterdiń, úsh aýysymdy mektepterdiń problemalaryn sheshýge jáne oqýshy oryndarynyń tapshylyǵyn qysqartýǵa múmkindik beredi.
Mektepterdiń ashylý saltanatyna Premer-Ministrdiń orynbasarlary Roman Skliar men Eraly Toǵjanov, bilim jáne ǵylym ministri Ashat Aimaǵambetov, densaýlyq saqtaý ministri Aleksei Tsoi, Nur-Sultan qalasynyń ákimi Altai Kólginov jáne t. b. qatysty.
