QR Premer-Ministri Asqar Maminniń tóraǵalyǵymen Nur-Sultan qalasynyń jańa ortalyǵynyń qurylysyn baqylaý jónindegi memlekettik komissiianyń otyrysy ótti, dep habarlaidy "Ult aqparat" Úkimet basshysynyń resmi saityna silteme jasap.
Nur-Sultan qalasy qurylysynyń 2019-2023 jyldarǵa arnalǵan keshendi josparyn júzege asyrý týraly qala ákimi A. Kólginov, turǵyn úi salý, injenerlik jáne jol-kólik infraqurylymyn damytý týraly indýstriia jáne infraqurylymdyq damý ministri B. Atamqulov, elordany gazdandyrý týraly energetika ministri N. Noǵaev, mektepter salý týraly bilim jáne ǵylym ministri A. Aimaǵambetov, halyqty sýmen qamtamasyz etý jaǵdaiy týraly ekologiia, geologiia jáne tabiǵi resýrstar ministri M. Myrzaǵaliev, sondai-aq ortalyq memlekettik organdardyń basqa da basshylary beiindi jumys baǵyttary týraly baiandady.
Biyl Nur-Sultan qalasynda shamamen 3 mln sharshy metr turǵyn úi, onyń ishinde 8 myń páter qoljetimdi jeńildikti turǵyn úide paidalanýǵa beriledi. Turǵyn úi alaptarynyń injenerlik-kommýnikatsiialyq infraqurylymyn damytý jumystary júrgizilip jatyr.
Úleskerler máselesin sheshý aiasynda biyl 20 nysannyń qurylysy aiaqtalady (2019 jyly – 10). Jeltoqsan aiynyń basynda 7 jyldyq tarihy bar «Garant» TK paidalanýǵa berildi. Qalǵan 22 problemalyq nysandy 2021-2023 jyldar aralyǵynda paidalanýǵa berý kózdelgen.
Osy jyly elordada 150 aýla jáne 60 qoǵamdyq keńistik (760 myń sharshy metr) abattandyryldy, 106 myń jasyl jelek otyrǵyzyldy.
JEO-1 jáne JEO-2 ishinara gazǵa aýystyryldy. «Kóktal» turǵyn alabyna aparatyn gaz qubyrynyń qurylysy aiaqtaldy. «Jeleznodorojnyi» turǵyn alabynda 100% taratý jelileri salyndy. «Agroqalashyqtyń» bir bóligi, «Kóktal-1», «Kóktal-2» turǵyn úi alaptary aiaqtalý satysynda tur, «Kúigenjar», «Michýrino», «Internatsionalnyi» turǵyn úi alaptaryn gazdandyrý jumystary júrgizilýde. Jalpy alǵanda, elordanyń turǵyn úi alaptarynda 300 km-ge jýyq gaz qubyry salyndy, 5 myńnan astam úi gazben jabdyqtaý júiesimen qamtamasyz etildi.
Biyl elordada 12 mekteptiń qurylysy aiaqtaldy, bul ótken jyldyń kórsetkishinen 2 ese kóp. 2021 jyly qosymsha 15 mektep salyp, paidalanýǵa berý josparda bar.
Otyrysqa qatysýshylar turǵyn úidiń qoljetimdiligin odan ári arttyrý, áleýmettik nysandar qurylysy, tirshilikti qamtamasyz etý jáne kólik infraqurylymyn damytý, áleýmettik mańyzy bar azyq-túlik ónimderiniń baǵasyn ustap turý tárizdi júieli máselelerdi qarastyrdy.
Premer-Ministr qalanyń qysqa merzimdi jáne uzaq merzimdi damýyna qatysty barlyq máseleler bes jyldyq kezeńge arnalǵan Elordanyń yqsham qurylysy jónindegi keshendi josparmen úilestirilýi tiis ekenin atap ótti.
«Qazaqstannyń Tuńǵysh Prezidenti – Elbasy Nursultan Ábishuly Nazarbaev pen Memleket basshysy Qasym-Jomart Kemeluly Toqaev elordany damytýǵa erekshe kóńil bóledi. Nur-Sultan qalasy qurylysynyń keshendi josparynyń is-sharalaryn sapaly ári ýaqytyly oryndaý úshin barlyq sharalardy qabyldaý qajet», — dedi A. Mamin.
Úkimet basshysy elordany damytýǵa investitsiialar tartý boiynsha jumysty jandandyrý qajettigine, turǵyn úi, áleýmettik-mádeni jáne kólik infraqurylymy qurylysynyń josparlanǵan kólemin qamtamasyz etýge, sondai-aq qalany sýmen qamtamasyz etý jáne abattandyrý problemalaryn sheshý qajettigine nazar aýdardy.
