Ekonomikanyń damytý úshin jańa institýtsionaldyq jaǵdai jasalady. 2021 - 2023 jyldarǵa arnalǵan makroekonomikalyq saiasat sharalaryn úilestirý týraly kelisim jaily Úkimet basshysy Asqar Mamin osylai dedi, dep habarlaidy QazAqparat.
«Bul kelisim – Úkimet, Ulttyq bank pen Qarjy naryǵyn retteý jáne damytý agenttigimen kelisilgen is-qimylyn qamtamasyz etedi. Halyqtyń turmys deńgeii men ál-aýqatyn arttyrý - eldiń áleýmettik-ekonomikalyq saiasatynyń basymdyǵy. Ol úshin aqsha-kredit, salyq-biýdjet jáne qurylymdyq saiasat, sondai-aq qarjy sektoryn damytý saiasaty úilestiriledi», - dedi Asqar Mamin Úkimet otyrysynda.
Onyń aitýynsha birlesken sharalardy iske asyrý úsh baǵyt boiynsha júrgiziledi.
«Birinshi «Makroekonomikalyq ornyqtylyqty arttyrý» baǵyty aiasynda tómen infliatsiia, qarjy júiesiniń turaqtylyǵy men ekonomikanyń ósimi arasynda teńgerimdi saqtai otyryp, iskerlik belsendilikti yntalandyrý boiynsha sharalar qabyldanady. Infliatsiiany birtindep tómendetý jáne ony ornyqty ekonomikalyq ósimge yqpal etetin tómen deńgeide ustaý boiynsha jumys jalǵasady. «Qarjy naryǵyn damytý» degen ekinshi baǵytty iske asyrý 2030 jylǵa deiingi qarjy sektoryn damytý tujyrymdamasyn qabyldaýdy kózdeidi. Qarjy júiesiniń turaqtylyǵy men ekonomikanyń ósimin qamtamasyz etý qajettiligin eskere otyryp, qarjy mehanizmi negizinde ekonomikany banktik kreditteýdi aitarlyqtai keńeitý boiynsha sharalar qabyldanady», - dedi ol.
Odan bólek «Ekonomikalyq ósýdiń uzaq merzimdi áleýetin arttyrý» degen úshinshi baǵyty aiasynda básekege qabiletti shikizattyq emes sektorǵa, óńirlik jáne jahandyq qosylǵan qun tizbegine kirigýge negizdelgen ekonomikanyń jańa qurylymyn qalyptastyrý tetigi yntalandyrylmaq.
«Ekonomikanyń sapaly jáne ornyqty damýy úshin túbegeili jańa institýtsionaldyq jaǵdai jasalynady. Jańa ekonomikalyq jaǵdaida halyqtyń turmys sapasy men ál-aýatynyń artýyna yqpal etedi», - dedi ol.
Otyrysta Úkimet músheleri tiisti Úkimet qaýlysynyń jobasyn qoldap daýys berdi.
«Barlyq múddeli memlekettik organdar, Ulttyq Bank pen Qarjy naryǵyn retteý agenttigi kelisimniń is-sharalaryn belgilengen merzimde, sapaly oryndaýdy qamtamasyz etýi qajet», - dedi Asqar Mamin.
