2020 jyly barlyq syn-qaterlerdi der kezinde qabyldanǵan naqty sharalardyń arqasynda eńserdik. Bul týraly Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Eldegi epidemiologiialyq jaǵdai baqylaýda. Degenmen keibir óńirlerde azamattardyń qaýipsizdigin qamtamasyz etý úshin áli de birqatar shekteý bar. Epidemiologiialyq jaǵdaidyń turaqtanýymen qatar qyzmet kórsetý sektory da birtindep qalpyna kele bastady. Jeltoqsan aiynda qarashamen salystyrǵanda saýda jáne bailanys salalaryn qalpyna keltirý qarqyny jalǵasýda», - dedi Premer-Ministr.
Onyń aitýynsha, ótken jyldyń qorytyndysy boiynsha 10 óńirde 7 negizgi kórsetkishtiń beseýi boiynsha áleýmettik-ekonomikalyq damýdyń ósýi baiqalady. Bular – Aqmola, Aqtóbe, Almaty, Shyǵys Qazaqstan, Jambyl, Qostanai, Soltústik Qazaqstan jáne Túrkistan oblystary men Nur-Sultan jáne Shymkent qalalary. Tórt óńirde 4 kórsetkish boiynsha oń dinamika baiqalady. Olar – Qaraǵandy, Mańǵystaý jáne Pavlodar oblystary men Almaty qalasy.
«2020 jyl kúrdeli boldy. Biraq, barlyq syn-qaterlerdi der kezinde qabyldanǵan naqty sharalardyń arqasynda eńserdik. Qazirgi jahandyq ekonomikalyq jaǵdaida Qazaqstannyń turaqty áleýmettik-ekonomikalyq damýyn qamtamasyz etý - partiianyń «Ózgerister joly: árkimge laiyqty ómir!» sailaýaldy baǵdarlamasyn tiimdi iske asyrý arqyly qamtamasyz etý kerek. Osynyń arqasynda, eń bastysy, halyqtyń ómir súrý sapasyn jaqsartyp, ál-aýqatyn arttyrýǵa jaǵdai jasalynady. Osyǵan bailanysty barlyǵymyz partiianyń baǵdarlamasyn iske asyrýǵa bar kúsh-jigerin salýy qajet», - dedi Asqar Mamin.
