QR Premer-Ministri Asqar Maminniń tóraǵalyǵymen ótken Úkimet otyrysynda mal sharýashylyǵyn damytý, «Nurly jer» memlekettik baǵdarlamasyn iske asyrý barysy, Nur-Sultan qalasynda jeńil relsti transport jobasynyń qurylysyn jalǵastyrý máseleleri qaraldy, dep habarlaidy "Ult aqparat" primeminister.kz saityna silteme jasap.
Mal sharýashylyǵyn damytý máseleleri boiynsha aýyl sharýashylyǵy ministri S. Omarov, «QazAgro» holdinginiń basqarma tóraǵasy E. Qarashókeev, Batys Qazaqstan oblysynyń ákimi Ǵ. Esqaliev, Qyzylorda oblysynyń ákimi Q. Ysqaqov, Soltústik Qazaqstan oblysy ákiminiń orynbasary M. Tasmaǵanbetov, aýyl sharýashylyǵy kásiporyndarynyń basshylary — «Empire Food» kompaniiasynyń bas direktory A. Djavidan, «Makinsk qus fabrikasy» kompaniiasynyń vitse-prezidenti R. Toqseiitova baiandama jasady.
Mal sharýashylyǵy — elimizdiń agroónerkásiptik kesheniniń jetekshi salasy. 2019 jyldyń birinshi jarty jyldyǵynyń nátijesi boiynsha mal sharýashylyǵynda jalpy ónimniń kórsetkishteri 2018 jyldyń osyndai kezeńimen salystyrǵanda 10,5%-ǵa ósti, mal azyǵy daqyldarynyń egis alańy 19-ǵa ulǵaidy.
«Elbasy N. Nazarbaevtyń tapsyrmasy boiynsha agrarlyq salany sapaly damytý, ekonomikadaǵy onyń úlesin arttyrý boiynsha Agroónerkásiptik keshendi damytýdyń 2021 jylǵa deiingi memlekettik baǵdarlamasy qabyldandy», — dep QR Premer-Ministri, QR Prezidenti Q. Toqaev aýyl sharýashylyǵynda eńbek ónimdiligin arttyrý jáne óńdelgen ónim eksportyn damytý boiynsha mindetterdi belgilegenin atap ótti.
Biyl 15 shildede Úkimettiń keńeitilgen otyrysynda Memleket basshysy agroónerkásiptik keshenge strategiialyq investorlardy tartý mindetin qoiǵan-tyn.
Asqar Mamin áleýetti investorlarmen belsendi jumys júrgizip, olarǵa qolaily jaǵdailar jasaý qajettigin aitty.
«Bul jumys únemi júrgizilýi tiis. Bizdiń ortaq mindetimiz – salaǵa keletin investitsiialardy jyl saiyn keminde 30%-ǵa arttyrý. 2020 jylǵa qarai 211 mlrd teńgege deiin, 2021 jylǵa qarai – 274 mlrd teńgege deiin ulǵaitý qajet», — dedi Asqar Mamin.
Jańa sút fermalaryn salý arqyly óńdeý kólemin ulǵaitý áleýeti, sút óńdeý kólemin 2022 jylǵa qarai 2,2 mln tonnaǵa jetkizýdiń barlyq múmkindigi bar.
Aýyl sharýashylyǵy ministrligine «Qazagro» holdingimen jáne oblystardyń ákimdikterimen birlesip, sútti-taýarly mal sharýashylyǵynyń kólemin arttyrý, otandyq qus sharýashylyǵyn damytý, halal ónim eksportyn damytý sharalaryn qabyldaý tapsyryldy.
«Nurly jer» memlekettik baǵdarlamasyn iske asyrý barysy týraly QR indýstriia jáne infraqurylymdyq damý ministri R. Skliar, «Báiterek» holdinginiń tóraǵasy A. Áriphanov, Mańǵystaý oblysynyń ákimi S. Turymov, Túrkistan oblysy ákiminiń orynbasary Q. Aitmuhametov, Almaty oblysy ákiminiń orynbasary S. Beskempirov baiandady.
2019 jyly shamamen 13 mln sharshy metr turǵyn úi salý josparlanǵan. Bul ótken jylǵy kórsetkishten 500 myń sharshy metrge artyq. Jyl saiyn 6 myń az qamtylǵan otbasy men 3 myń jumys isteitin jastardy baspanamen qamtamasyz etý mindettemesi qabyldandy.
«Barlyq zańnamalyq normalar qabyldanyp, qajetti qarajat bólindi», — dep Asqar Mamin, áleýmettik baǵyttaǵy turǵyn úi kólemin tolyǵymen berý jáne satyp alý boiynsha naqty sharalardy qabyldaý kerek ekenin aitty.
Sondai-aq, QR Úkimetiniń basshysy turǵyn úidi salýǵa, injenerlik infraqurylymdy jetkizýge ýaqytyly daiyndalýdyń mańyzy zor ekenin atap ótti.
«Memleket basshysy barlyq turǵyn úi baǵdarlamalaryn birtutas turǵyn úi saiasatyna biriktirýdi tapsyrdy. Sondyqtan biyl 2025 jylǵa deiingi jańa «Nurly jer» memlekettik baǵdarlamasy qabyldanady, onyń aiasynda 650 myńǵa jýyq otbasy nemese 2 mln-nan astam adam jańa turǵyn úimen qamtamasyz etiledi», — dedi Asqar Mamin.
Nur-Sultan qalasynda jeńil relsti transport jobasynyń qurylysyn jalǵastyrý máseleleri boiynsha ákim A. Kólginov baiandady.
«Ákimniń baiandamasynan osy jobanyń elordaǵa qajet ekenin kórip otyrmyz. Joba túbegeili qaitadan qarastyrylyp, ol boiynsha ońtailandyrý jumystary júrgizilýde. Nur-Sultan ákimdiginiń aqparaty boiynsha, jobany iske asyrý barysynda jáne nesie berilgen merzimde jobanyń quny 1,2 mlrd dollarǵa únemdeletin bolady. Birqatar atqarylǵan jumystar nátijesinde Astana bankine aýdarylǵan 258 mln dollar kólemindegi qarajat Nur-Sultan ákimdigine jobany odan ári júzege asyrýǵa qaitarylady. Jalpy, bul joba elordanyń qoǵamdyq kóligin damytýǵa úles qosatynyna senemiz», - dedi Asqar Mamin.
