QR Premer-Ministri Asqar Maminniń tóraǵalyǵymen ótken Úkimet otyrysynda elimizdiń 2020 jylǵy qańtar-naýryzdaǵy áleýmettik-ekonomikalyq damý qorytyndysy jáne respýblikalyq biýdjettiń atqarylýy qaraldy, dep habarlaidy "Ult aqparat" primeminister.kz saityna silteme jasap.
Ekonomikanyń, bank salasynyń ahýaly, respýblikalyq biýdjettiń oryndalýy, memlekettik satyp alýlardaǵy jergilikti qamtý týraly ulttyq ekonomika ministri R. Dálenov, Ulttyq bank tóraǵasy E. Dosaev, Premer-Ministrdiń birinshi orynbasary – qarjy ministri Á. Smaiylov, «Samuryq-Qazyna» UÁQ» AQ kompaniialarynyń kórsetkishteri týraly – Qordyń basqarma tóraǵasy A. Esimov, ónerkásip pen energetika sektoryndaǵy jaǵdai týraly indýstriia jáne infraqurylymdyq damý ministri B. Atamqulov, energetika ministri N. Noǵaev, óńirlerdiń damýy týraly Qostanai, Almaty, Aqtóbe oblystarynyń ákimderi A. Muhambetov, A. Batalov jáne O. Orazalin baiandady.
Biyl qańtar-naýryz ailarynda JIÓ ósimi 2019 jyldyń sáikes kezeńine 2,7% qurady. Negizgi kapitalǵa salynǵan investitsiialar 5,1%-ǵa artty. Altyn-valiýta qory $30 mlrd jetti, Ulttyq qor aktivteri – $57,5 mlrd.
Elimizdiń negizgi salalary jalpy oń dinamika kórsetti. Taý-ken óndirisi salasyndaǵy ósim – 5%, óńdeý salasynda – 8,8%, qurylysta – 11,7%, mashina jasaýda – 30,4% kórsetti. Degenmen, álemdegi pandemiiaǵa bailanysty engizilgen shekteýlerdiń áseri birtindep baiqala bastady — osy jyldyń birinshi toqsanynda saýdanyń ósýi 1%-dy, qarjy salasy men saqtandyrý qyzmetteri – 0,7%-dy qurady, al kólik sektory 1,3%-ǵa tómendep, teris dinamika kórsetti.
Biylǵy birinshi toqsanynyń qorytyndysy boiynsha negizgi kórsetkishter boiynsha áleýmettik-ekonomikalyq damýdyń ósýiniń ozyq qarqyny Aqmola, Batys Qazaqstan, Túrkistan, Qostanai, Qaraǵandy oblystarynda jáne Nur-Sultan qalasynda qamtamasyz etiledi, ortasha respýblikalyq kórsetkishterge Almaty, Aqtóbe, Mańǵystaý, Soltústik Qazaqstan, Pavlodar, Shyǵys Qazaqstan oblystarynda jáne Almaty qalasynda qol jetkizildi, keibir kórsetkishter boiynsha respýblikalyq deńgeiden tómen deńgeidi Atyraý, Jambyl, Qyzylorda oblystary, sondai-aq Shymkent qalasy kórsetti.
Úkimet basshysy ortalyq jáne jergilikti atqarýshy organdardyń birinshi basshylaryna biýdjet qarajatynyń ýaqytyly ári sapaly igerilýin, onyń ishinde olardyń ekonomikanyń naqty sektorlaryna deiin jetkizilýin baqylaýda ustaýdy tapsyrdy.
Premer-Ministr álemdik jáne óńirlik ekonomikalardaǵy qazirgi syn-tegeýrinderge jaýap retinde Úkimettiń daǵdarysqa qarsy sharalar keshenin qabyldap, iske asyryp jatqanyn atap ótti — Jumyspen qamtýdyń jol kartasy bekitildi, qurylysty keńeitý boiynsha birqatar memlekettik baǵdarlamalardy qarjylandyrý ulǵaityldy, ShOB kásiporyndaryn salyqtyq yntalandyrý engizildi, «Qarapaiym zattar ekonomikasy» jeńildikpen nesielendirý baǵdarlamasy keńeitildi.
«Qajet sharalar qabyldandy, endi óńirler qarqyndy jumys isteýi kerek. Barlyǵy memlekettik organdardyń tiimdi jáne úilesimdi jumysyna bailanysty», — degen Mamin qatań sanitarlyq-epidemiologiialyq sharalardy saqtaýmen óńirlerde daǵdarysqa qarsy sharalardyń iske asyrylýyna baqylaýdy qamtamasyz etýdi tapsyrdy.
