QR Premer-Ministri Asqar Maminniń tóraǵalyǵymen ótken Úkimet otyrysynda 2020 jylǵy qańtar-mamyrdaǵy elimizdiń áleýmettik-ekonomikalyq damý qorytyndysy jáne respýblikalyq biýdjettiń atqarylýy qaraldy, dep habarlaidy "Ult aqparat" primeminister.kz saityna silteme jasap.
Premer-ministr dereginshe, biylǵy qańtar-mamyr ailarynda JIÓ 2019 jyldyń sáikes kezeńine qaraǵanda 1,7%-ǵa tómendegen, bul pandemiiadan týyndaǵan álemdegi jáne aimaqtaǵy iskerlik belsendiliktiń kúrt quldyraýyna, sondai-aq shikizat pen kapitaldyń halyqaralyq naryqtaryndaǵy turlaýsyzdyqqa bailanysty.
Sonymen qatar Úkimet qabyldap jatqan sharalar men ulttyq ekonomikada jinaqtalǵan turaqtylyq QR ekonomikasynyń naqty sektorynyń senimdi ósý qarqynyn qamtamasyz etýge jol ashty. Taý-ken ónerkásibiniń kólemi 5,2%-ǵa, óńdeý ónerkásibi – 4,9%-ǵa, onyń ishinde mashina jasaý – 18,5%-ǵa, farmatsevtika – 21,2%-ǵa, jeńil ónerkásip – 10,8%-ǵa, qurylys materialdaryn óndirý – 12,3%-ǵa ósti. Qurylys kólemi 5,9%-ǵa ósti, saýda balansynyń oń saldosy qamtamasyz etildi.
Aýyl sharýashylyǵy jalpy óniminiń kólemi 2,2%-ǵa ósti. Kóktemgi egis jumystary ońtaily merzimde aiaqtaldy, olardyń qorytyndysy boiynsha egis alqaby 237,7 myń ga artyp, 22,5 mln ga qurady.
Halyqty jumyspen qamtýdy qoldaý sharalary belsendi túrde iske asyrylyp jatyr. Biyl jumysqa ornalasýǵa járdemdesý boiynsha keshendi sharalarmen QR 1,22 mln azamaty qamtylady.
Karantin rejimin kezeń-kezeńmen jeńildetý aiasynda qyzmet kórsetý sektoryndaǵy iskerlik belsendilik serpindi túrde qalpyna keltirilip jatyr. Máselen, mamyr aiynda sáýirmen salystyrǵanda saýda (+28,3%), kólik sektorynda (+20,7%) jáne halyqqa qyzmet kórsetý (+28,8%) salasynda aitarlyqtai ósim baiqaldy.
Osy jyldyń bes aiynyń qorytyndysy boiynsha negizgi kapitalǵa salynǵan investitsiialar kólemi ótken jyldyń sáikes kezeńimen salystyrǵanda 0,1%-ǵa ósti. Sonymen qatar mamyr aiynda biylǵy sáýir aiymen salystyrǵanda bul kórsetkish 32%-ǵa artty. Oǵan qosa negizgi kapitalǵa salynǵan jeke investitsiialar kóleminiń ósimi 25,7%-dy qurady.
«Bizdiń mindetimiz – qysqa merzimde ekonomikanyń daǵdarysqa deiingi damý qarqynyn qalpyna keltirý. Buǵan ekonomikany qoldaý jáne osy jyldyń sońyna deiin ekonomikalyq ósimdi qalpyna keltirý jónindegi keshendi jospardy iske asyrý boiynsha biz qabyldaǵan shuǵyl sharalar yqpal etýi tiis», — dedi A. Mamin.
Negizgi kórsetkishter boiynsha áleýmettik-ekonomikalyq damýdyń ozyq ósý qarqyny Qaraǵandy, Soltústik Qazaqstan, Almaty jáne Qostanai oblystarynda qamtamasyz etilgen, ortasha respýblikalyq mánderge Batys Qazaqstan, Jambyl, Aqmola, Túrkistan, Aqtóbe, Shyǵys Qazaqstan, Pavlodar oblystarynda, Nur-Sultan jáne Almaty qalalarynda qol jetkizildi, keibir kórsetkishter boiynsha respýblikalyq deńgeiden tómen óńirler — Atyraý, Qyzylorda, Mańǵystaý oblystary, sondai-aq Shymkent qalasy.
Úkimet basshysy óńirlerdiń Ekonomikalyq ósimdi qalpyna keltirýdiń keshendi jospary men memlekettik baǵdarlamalardy iske asyrý, otandyq óndiristi barynsha qoldaý, investitsiialar tartý, eksportty ilgeriletý, halyqtyń jumyspen qamtylýyn saqtaý jáne turaqty jumys oryndaryn qurý úshin barlyq sharalardy belsendi túrde qabyldaý qajettigin atap ótti.
«Qazirgi jaǵdaida biýdjet qarajatyn utymdy ári tiimdi jumsaý qajet. Árbir teńge ekonomikaǵa paida ákelýi tiis», — dedi A. Mamin.
Premer-Ministr jarty jyldyń qorytyndysy boiynsha ortalyq memlekettik organdar men ákimdikter jumysynyń tiimdiligi Memleket basshysy Qasym-Jomart Toqaevtyń tóraǵalyǵymen ótetin Úkimettiń keńeitilgen otyrysynda qaralatynyn atap ótti.
Jiynda ekonomikanyń, bank salasynyń jai-kúii, respýblikalyq biýdjettiń atqarylýy, memlekettik satyp alýdaǵy jergilikti qamtý týraly ulttyq ekonomika ministri R. Dálenov, Ulttyq bank tóraǵasy E. Dosaev, qarjy ministri E. Jamaýbaev, ónerkásip jáne energetika sektoryndaǵy jaǵdai týraly indýstriia jáne infraqurylymdyq damý ministri B. Atamqulov pen energetika ministri N. Noǵaev, agroónerkásip keshenindegi ahýal týraly aýyl sharýashylyǵy ministri S. Omarov, óńirlerdiń damýy týraly Almaty oblysynyń ákimi A. Batalov, Qaraǵandy oblysynyń ákimi J. Qasymbek, Soltústik Qazaqstan oblysynyń ákimi Q. Aqsaqalov baiandady.
