Árbir ministr, árbir ákim ishki jáne syrtqy investitsiiany tartý úshin úzdiksiz jumys jasaýy kerek. Bul týraly búgin Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Investitsiialyq belsendiliktiń jahandyq tómendeýi jaǵdaiynda sapaly investitsiia tartýǵa básekelestik óte joǵary. Otandyq jáne sheteldik investorlardy belsendi tartý arqyly jekeshelendirý josparyn tiimdi iske asyrýdy qamtamasyz etý qajet. Árbir ministr, ár ákim jáne ulttyq holdingter men kompaniialardyń basshylary ishki jáne syrtqy investitsiia tartý úshin úzdiksiz jumys jasaýy kerek»,- dedi Úkimet basshysy.
Onyń atap ótýinshe, árbir investorǵa salatyn kapital kólemi men jobanyń basymdyǵyna qarai jeke qoldaý sharalary usynylady.
Jańa jaǵdaida kásipkerlik sýbektilerin qoldaý úshin iskerlik belsendilikti tikelei yntalandyrý sharalary úsh baǵytta iske asyrylady.
«Bul – qarjylandyrýǵa qoljetimdilikti qamtamasyz etý, biznes júktemesin azaitý, ótkizý naryqtaryna qol jetkizýdi keńeitý. Biylǵy qańtar-aqpanda negizgi kórsetkishter boiynsha Almaty jáne Aqmola oblystarynda áleýmettik-ekonomikalyq damý qarqyny joǵary. Bes kórsetkish boiynsha Aqtóbe, Shyǵys Qazaqstan, Qaraǵandy, Qostanai oblystary men Shymkent qalasynda ósim baiqalady. Segiz óńirde 4 kórsetkish boiynsha oń dinamika. Bul - Jambyl, Qyzylorda, Mańǵystaý, Pavlodar, Soltústik Qazaqstan, Túrkistan oblystary, sonymen qatar, Nur-Sultan jáne Almaty qalalary. Eń tómen kórsetkishter Atyraý jáne Batys Qazaqstan oblystarynda. Ministrler men ákimderge jumysty jandandyryp, tiisti sharalar qabyldaýdy jáne mindetterdi naqty oryndaýdy tapsyramyn», - dedi Asqar Mamin.
