QR Premer-Ministri Asqar Maminniń tóraǵalyǵymen ótken Úkimet otyrysynda Qazaqstan Respýblikasynyń 2020 jylǵy qańtar-aqpandaǵy áleýmettik-ekonomikalyq damýynyń qorytyndysy jáne respýblikalyq biýdjettiń atqarylýy qaraldy, dep habarlaidy "Ult aqparat" primeminister.kz saityna silteme jasap.
Ekonomikanyń, bank salasynyń jai-kúii, respýblikalyq biýdjettiń oryndalýy, memlekettik satyp alýdaǵy jergilikti qamtý týraly QR ulttyq ekonomika ministri R. Dálenov, Ulttyq Bank tóraǵasy E. Dosaev, Premer-Ministrdiń Birinshi orynbasary – qarjy ministri Á. Smaiylov, eńbek naryǵyndaǵy jaǵdai jáne infraqurylymdyq jobalardy iske asyrý týraly QR eńbek jáne halyqty áleýmettik qorǵaý ministri B. Nurymbetov, sondai-aq indýstriia jáne infraqurylymdyq damý birinshi vitse-ministri Q. Óskenbaev baiandady.
Osy jyldyń qańtar-aqpanynda JIÓ ósimi 2019 jyldyń sáikes kezeńine qaraǵanda 3,3% qurady. Negizgi kapitalǵa salynǵan investitsiialar 11,6%-ǵa, onyń ishinde jeke investitsiialar 12,1%-ǵa ósti. Infliatsiia 6% maqsatty dálizde saqtalady.
Ekonomikanyń shikizattyq emes salalary, onyń ishinde avtomobil jasaýdy (72,2%) jáne jeńil ónerkásipti (12,4%) qosa alǵanda, óńdeýshi ónerkásip – 9,4%-ǵa, qurylys – 11,9%-ǵa ósim kórsetti. Ulttyq qor aktivteri $61,1 mlrd, altyn-valiýta rezervteri $29,3 mlrd qurady.
«Búgingi tańda syrtqy ekonomikalyq koniýnktýrada teris dinamika baiqalyp otyr. Birqatar iri halyqaralyq qarjy uiymdary men damý institýttary biyl álemdik ekonomikanyń ósý boljamdarynyń tómendegenin habarlady. Energiia tasymaldaýshylarǵa baǵanyń tómendeýiniń áseri OPEK-tiń naryqty turaqtandyrý boiynsha úilestirilgen sharalardy iske asyrýǵa qatysty kelisimge kele almaýy aiasynda kúsheie tústi», — dedi A. Mamin.
Premer-Ministr Memleket basshysy jedel áreket etý respýblikalyq shtabyn qurǵanyn atap ótti. Tiisti shtabtar barlyq óńirlerde qurylǵan. Úkimet jaǵdaidy odan ári damytýdyń birneshe nusqalaryn pysyqtady, olardyń árqaisysy qajetti resýrstarmen, onyń ishinde qarjylyq resýrstarmen qamtamasyz etilgen. Ulttyq ekonomikaǵa teris syrtqy koniýnktýradan áserlerdi azaitýǵa baǵyttalǵan birqatar sharalar ázirlendi.
«Atalǵan sharalardyń negizgi maqsaty – halyqtyń ál-aýqatynyń saqtalýyn qamtamasyz etý. Azamattarymyzdyń eshqaisysy qiyn jaǵdaida qalmaidy», — dedi A. Mamin.
Úkimet basshysy ákimdikterge áleýmettik mańyzy bar taýarlar boiynsha naryqtarda taýar interventsiialaryn ótkizý úshin turaqtandyrý qorlarynyń tiimdi jumysyn qamtamasyz etýdi tapsyrdy.
«Biz otandyq kásiporyndardyń taýarlary men qyzmetterine suranysty yntalandyrý boiynsha qolda bar barlyq ishki rezervterdi iske qosýymyz kerek», — dep Premer-Ministr, importty almastyrýdy kúsheitý jónindegi naqty sharalarmen jospar ázirleýdi tapsyrdy.
Premer-Ministr «Samuryq-Qazyna» UÁQ» AQ-ǵa, ulttyq basqarýshy holdingterge jáne Úkimetke esep beretin basqa da uiymdarǵa valiýta naryǵyndaǵy óz operatsiialaryn Ulttyq Bankpen kelisýdi tapsyrdy.
Qarjy ministrligine memlekettik organdarmen birlesip, bir apta merzimde basym emes investitsiialyq jobalardy iske asyrý merzimin aýystyra otyryp, biýdjettik shyǵystardyń basymdyqtaryn qaita qaraý jóninde usynystar engizý tapsyryldy.
Úkimet basshysy Eńbek jáne halyqty áleýmettik qorǵaý ministrligine ýaqytyly áleýmettik tólemderdi tolyq kólemde qamtamasyz etýge jáne jumyspen qamtýdyń jańa Jol kartasyn ázirleýge tapsyrma berdi, onyń aiasynda infraqurylymdyq jobalardy iske asyrý, áleýmettik nysandardy jóndeý jáne eldi mekenderdi abattandyrý jónindegi jumysty kúsheitý, sondai-aq ákimdiktermen birlesip azamattardyń eńbek quqyqtarynyń saqtalýyna qatań baqylaýdy qamtamasyz etý tapsyryldy.
«Bizdiń ortaq mindetimiz – áleýmettik turaqtylyqty qamtamasyz etý jáne jumyspen qamtý. Áreket etip turǵan jumys oryndaryn saqtaýǵa jáne jańa jumys oryndaryn qurýǵa erekshe nazar aýdarý qajet. Memlekettiń barlyq áleýmettik mindettemeleri oryndalatynyn atap ótkim keledi. Barlyq zeinetaqy men járdemaqy ýaqytyly ári tolyq kólemde tólenedi», — dep túiindedi A. Mamin.
