Premer-Ministri Asqar Mamin Úkimettiń Tsifrlyq ofisinde ortalyq memlekettik organdardyń basshylarynyń jáne óńirler ákimderiniń qatysýymen áleýmettik mańyzy bar azyq-túlik taýarlarynyń baǵasyn retteý máseleleri boiynsha keńes ótkizdi. Bul týraly Úkimettiń saity habarlady.
Saýda jáne integratsiia ministri Baqyt Sultanov, aýyl sharýashylyǵy ministri Erbol Qarashókeev, «Azyq-túlik kelisim shart korporatsiiasy» UK» AQ basqarma tóraǵasy Saparhan Omarov, Ulttyq bank tóraǵasynyń orynbasary Áliia Moldabekova, Básekelestikti qorǵaý jáne damytý agenttiginiń tóraǵasy Serik Jumanǵarin, Nur-Sultan qalasynyń ákimi Altai Kólginov, Qaraǵandy oblysynyń ákimi Jeńis Qasymbek, Almaty oblysynyń ákimi Amandyq Batalov aǵymdaǵy jaǵdai men atqarylyp jatqan jumystar týraly baiandady.
«Áleýmettik mańyzy bar azyq-túlik taýarlary baǵasynyń ósýine jol bermeý máselesi Memleket basshysy Qasym-Jomart Toqaevtyń erekshe baqylaýynda. Azyq-túlik baǵasy – bul áleýmettik ózekti másele. Úkimet Infliatsiiaǵa qarsy den qoiý sharalarynyń keshenin, birinshi kezekte AÓK sektoryndaǵy qundy qalyptastyrýdyń búkil tizbegi boiynda baǵalardy turaqtandyrý boiynsha iske asyrady», — dedi Mamin.
Negizgi agrarlyq elderdegi, onyń ishinde QR-daǵy qolaisyz klimattyq jaǵdailar negizgi aýyl sharýashylyǵy daqyldarynyń shyǵymdylyǵynyń tómendeýine alyp keldi. Osyǵan bailanysty baǵanyń ósýi, sondai-aq kórshi elder tarapynan aýyl sharýashylyǵy ónimine suranystyń artýy baiqalady.
Biyl 8 aida áleýmettik mańyzy bar azyq-túlik taýarlary baǵasynyń ósýi 9,7% qurady. Sońǵy aida baǵanyń 0,7 paiyzdyq tarmaqqa tómendeýi baiqalady.
Infliatsiiaǵa qarsy den qoiý sharalary aiasynda 2021 jyly «Azyq-túlik kelisim shart korporatsiiasy» UK» AQ 87 mlrd teńgege (2020 jyly – 40 mlrd teńgege) aýyl sharýashylyǵy ónimderin satyp alýdy josparlap otyr. Bul rette satyp alynatyn daqyldardyń tizbesi 4-ten 9-ǵa deiin keńeitildi: jumsaq bidai, qatty bidai, arpa, suly, kúnbaǵys, raps, zyǵyr, soia, qaraqumyq. Atalǵan ónimder ishki naryqty qamtamasyz etý úshin, onyń ishinde un tartý kásiporyndaryna, qus jáne mal sharýashylyǵy sharýashylyqtaryna ótkizý úshin paidalanylatyn bolady.
Básekelestikti qorǵaý jáne damytý agenttigi baǵany tómendetý týraly 68 habarlama shyǵardy, 8 tergeý taǵaiyndaldy. Nur-Sultan jáne Almaty qalalarynda, Qostanai, Qaraǵandy, Atyraý, Mańǵystaý, Batys Qazaqstan jáne Shyǵys Qazaqstan oblystarynda ÁMAT-ta saýda ústemesinen asyp ketýdiń jáne syiaqy alýdyń 46 faktisi anyqtaldy. Osy óńirlerdiń basshylaryna shekti saýda ústemesinen asyra belgilegen saýda sýbektilerin jaýapkershilikke tartý jóninde shuǵyl sharalar qabyldaý qajettigi atap ótildi.
Jalpy, Premer-Ministr ákimdikter men ministrlikterge Infliatsiiaǵa qarsy den qoiý sharalary kesheniniń ýaqtyly jáne tolyq oryndalýyn qamtamasyz etýdi tapsyrdy.
Egin jinaý maýsymynyń aiaqtalýyna bailanysty ákimdikterge «ainalym shemasy» boiynsha qosymsha qarjylandyrý bólýdi jedeldetý jáne óńirlik turaqtandyrý qorlaryna buryn jetkizilgen azyq-túlik kólemin satyp alýdy júzege asyrý tapsyryldy. Bul rette forvardtyq satyp alý sheńberinde astyq jetkizý boiynsha «Azyq-túlik korporatsiiasy» UK» AQ aldynda aýyl sharýashylyǵy taýaryn óndirýshilerdiń mindettemelerin oryndaýdy qamtamasyz etý mindeti qoiyldy.
