Biznestiń qarqyndy damýyna barynsha qolaily jaǵdai jasaý úshin aýqymdy konstrýktivti jumys júrgizilýde. Úkimet otyrysynda Premer-Ministr Asqar Mamin salada atqarylyp jatqan sharýalarǵa osyndai baǵa berdi, dep habarlaidy QazAqparat.
«Biznestiń qarqyndy damýyna barynsha qolaily jaǵdai jasaý úshin aýqymdy konstrýktivti jumys júrgizilýde. Sonymen qatar pandemiia óz túzetýlerin engizdi, shekteýlerden shaǵyn jáne orta biznes zardap shekti. Júrgizilgen jumys nátijesinde Ekonomikalyq ósýdi qalpyna keltirý jónindegi 2021 jylǵa arnalǵan keshendi jospar jańartyldy, onda shaǵyn jáne orta biznes sýbektilerin qoldaýdyń qosymsha 60 sharasy kózdelgen», - dedi Premer-Ministr.
Ol, sondai-aq, salyqtyq jeńildikter arqyly biznestiń júktemesin azaitý, salyqtyq ákimshilendirýdi jeńildetý, jeńildetilgen qarjylandyrýǵa qoljetimdilikti keńeitý, memlekettik satyp alýǵa qoljetimdilikti jeńildetý, kásipkerlik qyzmetti retteýdi azaitý sharalarynyń júieli júrgizilgenin atady.
«Biyl shaǵyn jáne orta biznestiń qarjylandyrýǵa qoljetimdiligin keńeitý sheńberinde 47 myńǵa jýyq jobany qamti otyryp, 2,5 trln teńgeden astam jeńildikpen kredit berý usynyldy. Kásipkerlikti qoldaý baǵdarlamalary boiynsha biznestiń ótinimderin qaraý merzimderin 21 kúnnen 5 jumys kúnine deiin qysqartý jumysy júrgizildi. Kreditterdi sýbsidiialaý jáne olarǵa kepildik berý sheńberinde memlekettik kórsetiletin qyzmetterdi tsifrlandyrý biyl 97% deiin ulǵaidy», - dedi Asqar Mamin.
Premer-Ministr 2021 jylǵy 1 sáýir – 1 maýsym aralyǵynda shaǵyn jáne orta biznes sýbektileri úshin eńbekaqy tóleý qorynan ustalatyn salyqtardyń barlyq túrin tóleý merzimi keiinge shegerilgenin eske saldy. Bul bizneske shamamen 200 mlrd teńgeni saqtaýǵa múmkindik bergen kórinedi.
