Sot «QazTAG» HAA bas redaktory A. Qasenovke qatysty bultartpaý sharasyn «kúzetpen ustaýǵa» aýystyrdy. Bul týraly Almaty qalasynyń prokýratýrasy habarlady, dep habarlaidy ult.kz.
Almaty qalasynyń Almaly aýdandyq sotynda A. Qasenovke, A. Mataevqa jáne basqalarǵa qatysty qylmystyq isti qaraý jalǵasýda.
Sot otyrysy barysynda memlekettik aiyptaýshy sottalýshy A. Qasenovke qatysty bultartpaý sharasyn «úiqamaqtan» «kúzetpen ustaýǵa» aýystyrý týraly ótinishhat bildirdi.
Bul protsestik áreketti qoldanýǵa sottalýshynyń úiqamaq sharttaryn óreskel buzýy negiz boldy.
Buǵan deiin sottyń 2026 jylǵy 24 jeltoqsandaǵy qaýlysymen A. Qasenovke qatysty «úiqamaq» túrindegi bultartpaý sharasy tańdalǵan.
Osy sharamen qatar oryndalýy mindetti birqatar shekteýler belgilendi, onyń ishinde áleýmettik jelilerdi, internetti paidalanýǵa, kez kelgen bailanys quraldaryn, sonyń ishinde internetti, uialy bailanysty jáne qalalyq telefondy paidalana otyryp, kelissózder júrgizýge jáne hat alysýǵa tyiym salyndy.
Osy shekteýlerdi buzýdyń kez kelgen faktisi bultartpaý sharasyn qatańyraq sharaǵa aýystyrý úshin negiz bolyp tabylady.
Osyǵan qaramastan, A. Qasenov atalǵan talaptardy birneshe ret buzǵan.
Atap aitqanda, A. Qasenov 2026 jylǵy 2 maýsymda «QazTAG» HAA paraqshasynda qylmystyq iske qatysty óziniń jeke beineúndeýin jariialady.
Sot protsesi ótetin kúni, iaǵni 2026 jylǵy 15 maýsymda ol dál osy paraqshada qylmystyq is boiynsha mediatsiiaǵa qatysty jańa jeke beineúndeýin taǵy da jariialady.
Budan bólek, A. Qasenov basty sot talqylaýynyń 2026 jylǵy 11 maýsym saǵat 10:00-de bastalatyny týraly tiisti túrde habardar etilse de, sot protsesine kelmedi, osylaisha ol sottyń 2025 jylǵy 24 jeltoqsandaǵy qaýlysymen belgilengen birinshi shaqyrý boiynsha sotqa kelý mindetin buzdy.
Sot úiqamaq sharttarynyń óreskel buzylǵanymen kelisip, sottalýshyǵa qatysty «kúzetpen ustaý» túrindegi bultartpaý sharasyn qoldandy.
Zańdylyq pen quqyqtyq tártip qaǵidattary quqyqtyq memlekettiń myzǵymas negizi ekenin basa aitý qajet. Zań barlyǵyna birdei, erekshelik joq, jáne eshkimge sot nusqaýlaryn elemeýge nemese buzýǵa ruqsat berilmeidi. Kásibi mártebe, qoǵamdyq jaǵdai nemese qyzmet salasy jaýapkershilikten qutylýdyń nemese sot tóreligi tarapynan erekshe kózqaras tanytýdyń negizi bola almaidy.
Prokýratýra qylmystyq-protsestik zańnama normalary men sot talaptaryn olardyń qyzmet túri men kásibi mártebesine qaramastan, ereksheliksiz barlyq azamattar oryndaýǵa mindetti ekenin eskertedi.
Sonymen qatar, protsess kezinde BAQ pen áleýmettik jelilerdegi mundai jariialanymdar sot sheshimine yqpal etý maqsatynda sotqa qysym kórsetý áreketi retinde baǵalanýy múmkin.
Atalǵan talaptar istiń barlyq taraptaryna, sonyń ishinde «QazTAG» HAA bas direktory A. Mataevqa da qatysty.
Sottyń sot tóreligin júzege asyrý jónindegi qyzmetine aralasý qylmystyq jaýaptylyqqa ákep soǵady.
