Mańǵystaý oblysynda ólgen qoqiqazdardyń tabylýyna qatysty oblystyq orman sharýashylyǵy jáne janýarlar dúniesi aýmaqtyq inspektsiiasy túsinikteme berdi, dep habarlaidy QazAqparat.
«24.04.2022 jyly Facebook áleýmettik jelisinde Beineý aýdanyna qarasty Sam qumynda Qazaqstannyń Qyzyl kitabyna engen 5 bas qoqiqazdyń (flamingo) ólgen deneleri qum arasynda jatqany túsirilgen beinejazba taralǵan. Qazirgi tańda, osy oqiǵa boiynsha «Sam» memlekettik orman qorynyń inspektorlary jedel túrde baryp, anyqtaý jumystaryn júrgizýde. Sonymen birge, «Ohotzooprom» ÓB» RMQK-nyń Aqtóbe filialynyń inspektorlary, Beineý aýdandyq PB-niń qyzmetkeri Beineý aýdanynyń aýmaǵyndaǵy Sam qumy jáne oǵan irgiles jatqan aýmaqtardy sholý jumystaryn júrgizýde» delingen Mańǵystaý oblystyq orman sharýashylyǵy jáne janýarlar dúniesi aýmaqtyq inspektsiiasy taratqan habarlamada.
Vedomstvo bul oqiǵaǵa qatysty óz boljamyn da jasaǵan.
«Sońǵy kezderde, Mańǵystaý oblysynyń aýmaǵynda shańdy daýyl soǵyp, kún jeldi bolyp tur. Jyl qustarynyń migratsiiasy Beineý aýdany aýmaǵynan ótedi. Osyndai qolaisyz aýa raiynda, qustardyń migratsiiasy kezinde ishindegi álsizderi orta jolda qonyp, ári qarai soltústik baǵytqa usha almai, olardyń ólimine ákelgen bolýy múmkin. Bul aýmaqta sý kózderi joq. Qustar tabylǵan jaǵdaida, veterinarlyq dárigerler tarapynan tiisti synamalar alý jumystary júrgiziledi» dep málimdeidi tabiǵat qorǵaýshylary.
