Uly ǵalym jáne oishyl Ábý Nasyr ál-Farabidiń 1 150 jyldyǵy qarsańynda Kýala-Lýmpýrdaǵy Qazaqstan Elshiligi Qazaq ulttyq ýniversiteti jáne Malaiziia halyqaralyq islam ýniversitetimen birlese uiymdastyrǵan beinekonferentsiiada malaiziialyq ǵalym Osman Bakardyń «Ál-Farabi: ómiri, oilary jáne mańyzy» atty kitaby boiynsha pikir almasý ótti, dep habarlaidy "Ult aqparat" QR SIM baspasóz qyzmetine silteme jasap.
Forýmǵa 233 adam, onyń ishinde ǵalymdar men zertteýshiler, Islam mádenieti filosofiiasy men tarihy salasynyń mamandary, oqytýshylar, stýdentter men qoǵam qairatkerleri qatysty.
Sharada Malaiziiadaǵy Qazaqstan Elshisi Bolat Imanbaev, ál-Farabi atyndaǵy QazUÝ-dyń birinshi prorektory Muhambetqali Búrkitbaev jáne Malaiziia halyqaralyq Islam ýniversitetiniń prorektory Ahmad Fariz Ismail is-sharanyń ekijaqty ǵylymi jáne mádeni almasýdy nyǵaitýdaǵy mańyzdylyǵyn atap ótti.
Baiandamalardy atalǵan keshendi zertteýdiń avtory – Malaiziia halyqaralyq Islam ýniversiteti janyndaǵy «Ál-Ǵazali» Islamdyq oi jáne órkenieti halyqaralyq institýtynyń professory Osman Bakar, QazUÝ filosofiia jáne saiasattaný fakýltetiniń dekany Áliia Masalimova jáne «Ýtara Malaiziia» ýniversitetiniń professory Hazim Shah Mýrad jasady.
Spikerler O. Bakardyń kitaby Malaiziiada jáne búkil álemde ál-Farabi murasyn zertteýge jáne tanytýǵa úlken úles qosqanyn atap ótti. Atalǵan kitapta Uly dala týmasynyń filosofiia men islamdyq oidy damytýdaǵy róli, sondai-aq Shyǵys pen Batys arasyndaǵy rýhani bailanystardy ilgeriletýge áseri jan-jaqty kórsetilgeni atap ótildi. Sessiia barysynda qatysýshylar ál-Farabidiń filosofiialyq ustanymdarynyń qazirgi kezeńdegi kókeikestigin jáne olardyń álemge yqpalyna qatysty birqatar máseleni talqylady.
Is-shara qorytyndysy boiynsha qatysýshylar Qazaqstan men Malaiziia ýniversitetteri arasynda yntymaqtastyqty keńeitýge jáne uly ǵalymnyń murasyn zertteý men nasihattaýda kúsh biriktirýge kelisti.
