Túrkistan oblysynyń ákimi Ómirzaq Shókeev apattan zardap shekken aimaqqa arnaiy kelip, Arystyń tájiribesine sáikes Maqtaaral aýdanynda da tiisti jumystar júrgiziletinin aitty, - dep habarlaidy oblystyq óńirlik kommýnikatsiia qyzmeti.
Oblys ákimi Maqtaaral aýdanyndaǵy sý basqan Jańaturmys pen Jeńis eldimekenine baryp, appattan japa shekken úilerdi qarap shyqty.
Eń aldymen oblys basshysy Eńbekshi aýyldyq okrýgi Jańaturmys aýylynda boldy. Munda 47 úide 321 turǵyn turǵan.
2 mamyr kúni túngi saǵat 01:50-de atalǵan eldimekende evakýatsiialaý is-sharalary bastaldy.
Jalpy eldi mekende 1 mektep, 1 medpýnkt, 1 meshit ornalasqan. Jańaturmys aýylynda 2 700 siyr, 3 000 qoi, 150 jylqy, 450 taýyq bolǵan. Oblys basshysy aýdan ákimi B.Asanovqa tótenshe jaǵdaidan zaqym kelgen áleýmettik nysan men zardap shekken mal-múlik sanyn anyqtaýdy tapsyrdy.
Budan keiin óńir basshysy Jeńis aýylyna aialdap, aýyldyń jaǵdaiymen tanysty. Bul aýylda 280 úi, 1 922 turǵyn bar.
Eldimekende 1 mektep, 2 balabaqsha, 1 medpýnkt, 1 meshit, 1 mádeniet úii ornalasqan. Qazirgi tańda atalǵan nysandardyń qanshalyqty zaqymdanǵany anyqtalyp jatyr. Bul aýylda qazirgi tańda jaiylym jerdiń 500 gektary, egistik alqabynyń 50 gektaryn sý basqan. Aýylda 350 siyr, 270 qoi, 300 túie, 70 jylqy, 700 taýyq bolǵan.
Eske sala keteiik, keshe Ózbekstanda Sardoba sý qoimasynyń bógeti jarylyp , eldi mekender, kommýnikatsiialyq jeli, egistikke zaqym kelgen. Sonyń saldarynan Maqtaaral aýdanynyń eki aýylyn sý basty. Maqtaaral aýdanynyń ákimi, aýdandyq tótenshe jaǵdai shtabynyń tóraǵasy Baqyt Asanovtyń tóraǵalyǵymen 2 mamyr túngi 00:00-de arnaiy jiyn ótip, tótenshe jaǵdai jariialandy. Sý basqan aýyldardan 5 400 adam qaýipsiz jerge kóshirildi.
