Túrkistan oblysy, Maqtaaral aýdanynda oryn alǵan tótenshe jaǵdai kezindegi mal shyǵyny tolyǵymen tólendi. Topan sý basqanda jalpy aýdandaǵy 22 otbasy 144 bas malynan aiyrylǵan bolatyn, dep habarlaidy "Ult aqparat".
Búginde «Túrkistan» korporativtik áleýmettik qory arqyly túiege 300 myń teńgeden 1,5 mln teńgege deiin, jylqyǵa 160 myńnan 380 myń teńgege deiin berildi. Al, siyrǵa 110 myńnan 220 myń teńge, usaq malǵa 25 myńnan 45 myń teńge aralyǵynda jáne úi qusynyń árbirine 2000 teńgege deiin ótemaqy tólendi.
Aita keteiik, jalpy tasqyn sýdan zardap shekken aýyldardy qoqystan tazartý kezinde 930-dan astam mal ólekseleri shyǵarylǵan bolatyn. Onyń ishinde 40-y iri qara, 876-sy usaq mal, 9-y jylqy jáne 6-y túie edi. Anyqtaý jumystary barysynda tórt túliktiń basym bóligi Ózbekstan Respýblikasynan topan sýmen aǵyp kelgeni belgili bolǵan.
Oblystyq aýyl sharýashylyǵy basqarmasy men Maqtaaral aýdandyq aýmaqtyq inspektsiiasy jáne aýdandyq «Veterinariialyq qyzmeti» KMM-niń ókilderinen arnaiy komissiia qurylyp, joǵalǵan úi janýarlaryn túgendeý jáne mal ólekselerin joiý jumystary júrgizildi. Búginde tótenshe jaǵdaidan zardap shekken eldi mekender tolyǵymen dezinfektsiialandy.
