Maqtaaral aýdanyndaǵy sý basqan eldimekenderde turatyn oqýshylar jazǵy kanikýldy tiimdi ótkizetin boldy. Bes aýyldaǵy 1210 oqýshy Almaty oblysy men Tólebi aýdanyndaǵy lagerlerde demalady dep josparlanyp otyr, dep habarlaidy "Ult aqparat".
Oblystyq ákimdiktiń málimetinshe, balalar Qapshaǵai qalasyndaǵy «Baldáýren-Qapshaǵai» oqý-saýyqtyrý lagerine 15 kúndik demalysqa jiberilmek.
Atalǵan ortalyqta 706 oqýshy úsh kezeńmen tynyǵady. Onyń 250-i kúni keshe jolǵa shyǵyp, lagerge attanyp ketti.
Al, 504 oqýshy jazǵy demalysyn Túrkistan oblysynyń Tólebi aýdanynda ornalasqan lagerde ótkizedi. Bastaýysh synyptyń 200 oqýshysy jáne olarǵa bas-kóz bolatyn 15 muǵalim men medbike «Baldáýren-Túrkistan» oqý-saýyqtyrý ortalyǵyna jolǵa shyǵyp ketti.
Jetkinshekter demalys oryndarynda qosymsha sabaq ta oqityn bolady. Bul sharalar óz kezeginde mektep jasyndaǵy balalardyń ýaqytyn tiimdi ótkizip, salaýatty ómir saltyn ustanýǵa baǵyttalǵan.
Sonymen qatar olardyń jańa dostar taýyp, tynyǵyp qaitýyna septigin tigizbek.
