QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda Túrkistan oblysynyń Maqtaaral aýdanyndaǵy eldi mekenderdi sý basýyna qatysty másele qaraldy.
Jiynda Túrkistan oblysynyń ákimi Ó. Shókeev baiandama jasady.
Ózbekstannyń Syrdariia oblysyndaǵy Sardoba sý qoimasy bógetiniń bir bóligi jarylyp, sý qoimasyndaǵy sý deńgeiin tómendetý úshin sýdy aǵyzý saldarynan Qazaqstannyń Túrkistan oblysy Maqtaaral aýdanynyń shekara mańyndaǵy kollektorlary sýǵa toltyryldy. Sýdyń aǵyp ketýiniń saldarynan Maqtaaral aýdanynyń shekarasyndaǵy kollektordan sý tógilip, 5 eldi mekendegi 631 úidi sý basty: Jańa Turmys – 46 úi, Jeńis – 130 úi, Firdoýsi – 250 úi, Órgebas – 194 úi, Dostyq – 11 úi. Maqtaaral aýdanynda 3 600 ga egis alqaby zardap shekti, onyń 85%-y maqta egýge arnalǵan. Sý tasqyny bastalǵannan beri jalpy sany 30 581 adamdy quraityn 14 eldi meken evakýatsiialandy.
«Arnaiy úkimettik komissiia quryldy. Ony Premer-Ministrdiń orynbasary Roman Skliar basqarady. Quramynda ortalyq jáne jergilikti atqarýshy organdardyń basshylary bar. Komissiia Jańa turmys, Jeńis, Firdoýisi, Órge bas, Dostyq aýyldaryna kelgen shyǵyndy shuǵyl túrde esepteý boiynsha jumysty júrgizedi. Odan keiin injenerlik, kólik, áleýmettik infraqurylym, úiler qalpyna keltiriledi. Zardap shekken turǵyndarǵa Úkimet tarapynan barlyq qajetti kómek kórsetiledi», - dedi Asqar Mamin.
