Jeńis jáne Jańa turmys eldi mekenderin sý basýyna bailanysty 2 myńnan astam turǵyn evakýatsiialandy. Bul týraly Tótenshe jaǵdailar komitetiniń baspasóz qyzmeti habarlady.
Túrkistan oblysyndaǵy qazirgi jaǵdaidy baǵalaý úshin Ishki ister ministriniń orynbasary Iýrii Ilin, ekologiia, geologiia jáne tabiǵi resýrstar vitse-ministri Sergei Gromov, aýyl sharýashylyǵy vitse-ministri Nurbek Daiyrbekov jáne Ulttyq ulan qolbasshysynyń orynbasary Arlen Búrkitbaev áýemen ushyp ótti.
«Maqtaaral aýdanyndaǵy Ferdoýsi jáne Nurly jol eldi mekenderine sý basý qaýpi tónip turǵandyqtan 3 myńnan astam adam evakýatsiialandy. Evakýatsiialanǵan turǵyndar Maqtaaral aýdanyndaǵy Atakent kentinde ornalasqan 9 evakýatsiialaý jáne qabyldaý pýnkterine ornalastyryldy» delingen baspasóz habarlamasynda.
TJK jedel shtaby jáne Túrkistan oblysynyń tótenshe jaǵdailar departamenti evakýatsiia joldarynyń ornalasýyn jáne zardap shekken halyqty qabyldaý pýnktileriniń ornalasýyn anyqtaýda. Respýblikalyq jedel shtabtyń basshysy - TJK basshysy Vladimir Bekker.
«Tótenshe jaǵdaidaǵy qutqarý jumystaryna Túrkistan oblysynyń Tótenshe jaǵdailar departamentiniń, Shymkent qalasynyń Tótenshe jaǵdailar departamentiniń, Ulttyq ulannyń, Qorǵanys ministrliginiń, aýdandyq politsiia bóliminiń, jergilikti atqarýshy organdardyń 635 adamy men 60 dana tehnikasy jumyldyryldy. Jedel jeli telefondary: 8-7253-34-06-50, 8-7254-12-22-25» delingen baspasóz habarlamasynda.
Sondai-aq, «Kazgidromet» RMK boljamy boiynsha, 2-6 mamyr aralyǵynda Túrkistan oblysynda jaýyn-shashyn jaýady. Kei jerde onyń kólemi 25 mm-ǵa deiin jetýi múmkin, sondyqtan oblystaǵy taýly aimaqtarda sý deńgeii kóterilýi yqtimal.
Esterińizge sala keteiik, 1 mamyrda Sardoba sý qoimasy bógetin sý shaiyp ketýine bailanysty Ózbekstannyń Syrdariia oblysyndaǵy eldimekendi sý basty.
Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Maqtaaraldaǵy ortalyq kollektordan sý tógilip, Jeńis, Jańa turmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avtomobil jolyn sý basyp, kólik júre almaýda. Tórt aýyldan 5400 adam qaýipsiz jerge kóshirilgen.
Sondai-aq Túrkistan oblysynda sý tasqyny qaýpi tóngen 3 aýyldyń halqy evakýatsiialanyp jatyr. Oblys ákimi Ómirzaq Shókeev halyqty sabyrǵa shaqyryp, tótenshe jaǵdaidy retteýge aimaqtyń tolyq múmkindigi bar ekenin aitty.
