Sý basyp qalǵan Maqtaaral aýdanyndaǵy aýyldarda birneshe blokpost qoiyldy. Oblys ákimdigi bul saqtyq sharalaryn uiymdastyrý úshin jasalyp jatqanyn túsindirdi, dep habarlaidy "Ult aqparat".
«Eńbekshi aýyldyq okrýgi jáne Jańa jol aýyldyq okrýgterinde ornalasqan Jeńis, Jańaturmys jáne Ferdoýsi eldimekenderine birneshe blokpost qoiyldy. Jańa jol aýyldyq okrýgi, Ferdoýsi aýylynda ornalasqan «Ferdoýsi» jalpy orta mektebiniń aýmaǵyna sý kóterilgen. Sonymen qatar 6 úidiń aýlasyn sý basqan. Eldimekenniń ishki kollektorlaryna sý tolǵan. Jeńis eldimekenine kiretin negizgi kópirdi sý shaiyp ketken. Kópirdiń uzyndyǵy 10 metr. Qazirgi tańda «Nurly jol» eldimekeninde 28 gektar maqta alqabyn sý basqan. Oblystyq TJD oqiǵa ornynda jumys júrgizip jatyr», delingen habarlamada.
Sondai-aq, sý basqan aýyldardaǵy mal jáne egistik, úi men áleýmettik nysandardyń naqty shyǵynyn anyqtaý maqsatynda oblys ákimdiginiń barlyq tiisti basqarma basshylary aýdanǵa barǵan. Qazirgi tańda tótenshe jaǵdaidan keltirilgen shyǵyn kólemi eseptelip jatyr.
Eske sala keteiik, keshe Ózbekstanda Sardoba sý qoimasynyń bógeti jarylyp, eldi mekender, kommýnikatsiialyq jeli, egistikke zaqym kelgen. Sonyń saldarynan Maqtaaral aýdanynyń eki aýylyn sý basty. Aýdanda 2 mamyrda túngi 00:00-de tótenshe jaǵdai jariialandy. Sý basqan aýyldardan 5 400 adam qaýipsiz jerge kóshirildi.
