Maqtaaral aýdanyndaǵy sý basqan eldimekenderde maldyń 85 paiyzy qutqarylǵan. Bul týraly Túrkistan oblystyq aýyl sharýashylyǵy basqarmasy basshysynyń orynbasary Turǵanbek Ospanov brifing barysynda málimdedi, dep habarlaidy "Ult aqparat".
Basqarma basshysy orynbasarynyń aitýynsha, búgingi tańda sarqyndy sýdan Eńbekshi jáne Jańa jol aýyldyq okrýgi zardap shekken.
«Máselen, Jańa jol aýyldyq okrýginde 404 mln teńgege shyǵyn kelgen. Aǵyndy sý 3602 gektar egistik jerge zaqym keltirse, sonyń 85 paiyzy - maqta alqaptary. Qalǵany - baqsha ónimderi. Maqta alqaptary múlde jaramai qalǵan. Eńbekshi aýyldyq okrýginiń Jańa turmys aýyly men Jeńis eldi mekenderinde biz shyǵyndy naqty anyqtai almai otyrmyz. Sebebi, onda jappai sý basqandyqtan ishine kirip kórý múmkin bolmai tur. Al, Nurlybaev aýyldyq okrýgine de sý betonnan ótip jatyr»,- deidi Turǵanbek Ospanov.
Búginde tótenshe jaǵdai qalyptasqan aimaqqa 95 aýyl sharýashylyǵy mamany jumyldyrylǵan. Olar sý basqan eldi mekenderde zerdeleý men shyǵyndy esepteý jumystaryn júrgizýde. Sýda qalǵan maldardy qutqarýshylarmen birge qaýipsiz jerge kóshirýde.
«Jańa jol aýyldyq okrýgindegi jeti eldi mekende eki kúnnen beri maldyń 85 paiyzyn sýdan shyǵaryp aldyq. Máselen, iri qaranyń - 80 paiyzǵa jýyǵyn (1100), jylqy - 89 paiyz (132), usaq maldan - 72 paiyzyn (221) kóshirip úlgerdik. Olardy kórshiles Keles aýdanyndaǵy jaiylymdarǵa apardyq. Sý qoimanyń janyndaǵy jaiylymdarǵa jetkizgenbiz. Degenmen jylqy maly ózderiniń turaqty mekenine qaityp ketip, biraz qiyndyq týǵyzýda. Al, sý basqan eldimekenderge qaiyqpen baryp, shyǵyn kólemin esepteimiz», - dedi Turǵanbek Ospanov.
