Túrkistan oblysy Maqtaaral aýdanynda TJ saldaryn joiý jumystarynyń barysy baiandaldy, dep habarlaidy "Ult aqparat".
«Jedel shtabtyń sheshimi boiynsha 7 mamyrda QR IIM TJ komitetiniń barsha kúshi eldi mekendi sýdan qurǵatý úshin Órgebas aýylyna baǵyttaldy. Sý basqan eldi mekenderde jinalǵan sý Órgebas aýyly tóńiregine qarai aǵylýda. Sondyqtan jasaq kúshteri men jabdyqtardy atalǵan aýylǵa qarai kóshirý sheshimi qabyldandy. Qazirgi ýaqytta nasostar arqyly 1 mln tekshe metrden astam sý shyǵaryldy», - delingen QR IIM TJ komiteti málimetinde.
Sonymen qatar, bul jumystarǵa Ózbekstan qutqarýshylary da jumyldyrylǵan.
Nurlyjol, Jańaturmys, Jeńis, Dostyq aýyldarynda IIM kúshimen sýdan qurǵatý, sondai-aq jeke zattardy, qujattar men múlikti evakýatsiialaý jumystary júrip jatyr.
TJ saldaryn joiý sharalaryna qutqarýshylar, áskeri qyzmetshiler, politseiler, jergilikti atqarýshy organdardyń qyzmetkerleri men volonterlar jumyldyrylǵan. Jalpy, 1300 adam, 220 tehnika, 15 júzý qurylǵysy men 46 motopompa tartyldy.
Budan bólek, apattyq-qutqarý jumystaryna 205 adam, 38 tehnika men 85 motopompa alyp kelgen Ózbekstan Tótenshe jaǵdailar ministrliginiń qurylymy qatysýda.
7 mamyr tańerteń tótenshe jaǵdai saldaryn joiý sharalaryna Nur-Sultan qalasy men Qaraǵandy oblysy TJ departamentteriniń qosymsha kúshteri jolǵa shyqty.
