QR Premer-Ministri Asqar Mamin Túrkistan oblysynyń Maqtaaral aýdanyndaǵy sý tasqyny saldarynan oryn alǵan tehnogendik sipattaǵy tótenshe jaǵdailardyń saldaryn joiýǵa qansha qarajat bólingenin jariia etti, dep habarlaidy "Ult aqparat".
«Ózbekstan Respýblikasynyń aýmaǵyndaǵy Sardoba sý qoimasy bógetiniń buzylýyna bailanysty Túrkistan oblysy ákiminiń biylǵy 2 mamyrdaǵy №3 sheshimimen jergilikti aýqymdaǵy tehnogendik sipattaǵy tótenshe jaǵdai jariialandy. «Qazaqstan Respýblikasy Úkimetiniń tótenshe rezervinen qarajat bólý týraly» Qazaqstan Respýblikasy Úkimetiniń biylǵy 13 mamyrdaǵy №291 qaýlysymen Túrkistan oblysynyń ákimdigine tótenshe jaǵdaidyń zardaptaryn joiýǵa aýdarý úshin, onyń ishinde: Maqtaaral aýdanynyń sý astynda qalǵan Dostyq, Jeńis, Jańa Turmys, Órgebas jáne Firdoýsi eldi mekenderiniń turǵyndaryna ótemaqy túrinde keltirilgen ziiandy (zalaldy) 100 000 teńgeden óteý úshin 650 mln teńge; turǵyn úilerdi salý úshin 4 mlrd teńge; Myrzakent eldi mekenindegi injenerlik infraqurylym qurylysyn júrgizý úshin 3,738 mlrd teńge; Órgebas jáne Firdoýsi eldi mekenderindegi sýmen jabdyqtaý júiesin qaita jańartý jáne qalpyna keltirý úshin 562 mln teńge; kólik infraqurylymyn qalpyna keltirý úshin 1,05 mlrd teńge bólindi», - delingen Premer-Ministrdiń atalǵan máselege orai Májilis depýtattarynyń resmi saýalyna bergen jaýabynda.
Úkimet basshysynyń atap ótýinshe, tehnogendik sipattaǵy tótenshe jaǵdailardyń saldarynan bes eldi mekende (Jeńis, Jańa Turmys, Dostyq, Órgebas jáne Firdaýsi) 1 030 turǵyn úi zardap shekti. Júrgizilgen tehnikalyq zerttep-qaraýdyń nátijeleri boiynsha 437 úi jańa qurylysqa jatady (sonyń ishinde 235 úi Úkimettiń tótenshe rezerviniń qarajaty esebinen).
«Sý tasqynynan zardap shekken zalaldy aldyn ala baǵalaý qorytyndysy boiynsha Úkimettik komissiia Dostyq, Jańa Turmys jáne Jeńis kentteriniń turǵyndaryn kóshirý jáne Myrzakent kenti aýmaǵynda ornalasqan jańa shaǵyn aýdanda olarǵa arnalǵan úiler salý týraly sheshim qabyldady. Osy maqsatta eldi mekenniń shetine 70 gektar alańymen jer ýchaskesi bólindi. Ázirlengen úlgilik jobalarǵa sáikes árbir úidiń jalpy alańy 100 sharshy metrdi quraidy, bólme sany tórteý bolady. Qurylys alańdarynda 32 qurylys kompaniiasy, 900 jumysshy jáne 60 birlik arnaiy tehnika jumys istep jatyr. Turǵyn úi qurylysyn biylǵy 1 tamyzǵa deiin aiaqtaý josparlanǵan», - dedi Úkimet basshysy.
Sonymen qatar, Premer-Ministr Jetisai jáne Maqtaaral aýdandarynda áleýmettik turaqtylyqty qamtamasyz etý maqsatynda Túrkistan oblysy ákimdiginiń usynysy boiynsha zańnamada belgilengen tártipte Ózbekstan Respýblikasynyń aýmaǵyndaǵy Sardoba sý qoimasy bógetiniń buzylýy saldarynan sý tasqynynan zardap shekken Túrkistan oblysynyń Maqtaaral jáne Jetisai aýdandarynyń agroónerkásiptik keshen sýbektilerine ótemaqy tóleý úshin 2020 jylǵa arnalǵan respýblikalyq biýdjette shuǵyl shyǵyndarǵa Qazaqstan Respýblikasy Úkimetiniń rezervinen 3490,8 mln teńge somasynda qarajat bólý boiynsha jumystar júrgiziletindigin atap ótedi.
