Maqtaaral aýdanynyń 90 jyldyq mereitoiynyń úshinshi kúni ultymyzdyń ulttyq oiyny – kókparǵa ulasty. Aýdan kásipkerleri men sport janashyrlarynyń demeýshiligimen ótken saiysqa QR Kókpar federatsiiasynyń prezidenti Muhtarhan Dildábekov arnaiy qatysty.
Jigitterdiń batyldyǵy men eptiligi, kúsh-jigeri men tózimdiligi synǵa túsetin kókpar oiyny - atadan balaǵa mura bolyp kele jatqan ulttyq qundylyǵymyz. Yqylym zamannan beri qanymyzǵa sińgen qasietimizdi dáripteý maqsatynda ótken Maqtaaral aýdanynyń 90 jyldyǵyna arnalǵan kókparǵa kórshiles Jambyl, Qyzylorda jáne Túrkistan oblysynyń barlyq aýdandarynan myńǵa tarta kókparshy qatysty. Atalmysh sharaǵa QR Kókpar federatsiiasynyń prezidenti, Myrzashól topyraǵynyń túlegi Muhtarhan Dildábekov te arnaiy qatysyp, shabandozdarǵa sáttilik tilep, merekelerimen quttyqtady.
«Atalmysh kókpardyń ereksheligi munda top jaryp júrgen aǵa býyn ókilderine qaraǵanda jas shabandozdar qarasy basym jáne bul kókpar komandalyq emes, árbir shabandozdyń bileginiń kúshi men taqymynyń myqtylyǵy synǵa túsetin kókpar. Ondaǵy maqsat – óskeleń urpaqtardyń arasynda at sportyna degen qyzyǵýshylyqty arttyra otyryp, buqaralyq sportty damytý. Oblys, respýblikalyq deńgeidegi kókpar birinshilikterine jastardyń daiyndalýyna múmkindikter jasaý», - deidi Maqtaaral aýdanynyń ákimi Baqyt Asanov.
Álemdik deńgeide moiyndalǵan qazaqtyń kókpar oiynyna jinalǵan eldiń de qarasy qalyń boldy. Kónekóz qariialar ulttyq qundylyqtarymyzdy nasihattap, jastar arasynda dostyq pen birlikti nyǵaitý maqsatynda kókpar oiynynyń shyǵý jáne damý tarihy jaiynda jastarǵa ǵibratty áńgimelerin aitty.
Kókpar sońynda salym salǵan shabandozdarmen qatar oiyn barysynda eptiligimen kózge túsip, kópshiliktiń yqylasyna bólengen qurysh bilekti jigitter, baby men baǵy qatar shapqan sáigúlik attar da uiymdastyrýshylar taǵaiyndaǵan arnaiy nominatsiialarǵa ie boldy.
