QR Premer-Ministri Asqar Maminniń tóraǵalyǵymen ótken Úkimet otyrysynda Túrkistan oblysynyń ákimi Ómirzaq Shókeev kórshiles Ózbekstanda dambanyń buzylyp, sonyń saldarynan Túrkistan oblysy Maqtaaral aýdanyndaǵy eldi mekenderdi sý basýyna bailanysty jaǵdaidy baiandady, dep habarlaidy "Ult aqparat" primeminister.kz saityna silteme jasap.
2020 jyly 1 mamyrda Ózbekstannyń Syrdariia oblysy Sardoba sý qoimasyndaǵy dambanyń bir bóligin sý shaiyp ketýiniń saldarynan jáne sý qoimasynda deńgeiin tómendetý úshin sýdy aǵyzý kesirinen Qazaqstannyń Túrkistan oblysy Maqtaaral aýdanyndaǵy shekara mańy kollektorlary sýǵa tolyp ketken. Kollektorlarǵa aqqan sý kólemi sekýndyna 180 kýbometrdi quraǵan, al kollektorlardyń ótkizgishtigi sekýndyna 120 kýbometrdi quraidy. Sonyń saldarynan Maqtaaral aýdanynda birneshe aýyl sý astynda qaldy. Óńirde tótenshe jaǵdai jariialandy.
Búgingi tańda 14 eldi mekennen 31 606 turǵyn evakýatsiialandy. Turǵyndarynyń sany 6 127 adam bolatyn 5 eldi meken — Jańa Turmys, Jeńis, Firdoýsi, Órgebas, Dostyq aýyldary tolyǵymen sý astynda qalǵan. 7 eldi mekenniń áli de sý astynda qalý qaýpi bar, al eki eldi mekende — Myrzakent jáne Aqjolda sý basý qaýpi seiilgendikten, turǵyndar óz úilerine oraldy. 15 myń adam turatyn Myrzakent kentinde sý basý qaýpin boldyrmaý úshin aýqymdy jumystar júrgizildi.
2 mamyr kúni Maqtaaral aýdanynda shuǵyl túrde tehnogendi sipattaǵy tótenshe jaǵdai jariialanyp, shuǵyl shtab quryldy. Apattan qutqarý jumystaryn júrgizý úshin 986 adam men 190 tehnika tartyldy. Sonymen qosa, Shymkent qalasynan, Qyzylorda jáne Jambyl oblystarynan 30 motopomp, sý jinaityn sorǵylar alyndy. Sonymen qatar, Ulttyq gvardiianyń áskeri bólimi 413 áskeri qyzmetker men 37 tehnika jiberdi. Qosymsha Almaty qalasyndaǵy Ulttyq gvardiianyń qutqarý batalonynan 320 áskeri qyzmetker men 26 tehnika jetkizildi.
Atakent jáne Maqtaaral kentteriniń, Jambyl aýyldyq okrýginiń mektepteriniń bazasynda 14 evakýatsiialyq qabyldaý pýnkti uiymdastyryldy, olarda búgingi tańda 3 200 adam ornalastyrylǵan. Qalǵan adamdar týysqandaryn panalaǵan. Evakýatsiialyq qabyldaý pýnktteri barlyq qajetti jabdyqtarmen jaraqtalǵan. Karantinge bailanysty jaǵdaidy eskere otyryp, 120 meditsina qyzmetkeri kómek kórsetýde.
Tótenshe jaǵdai saldarynan aldyn ala esepteýler boiynsha 845 turǵyn úi, 3 mektep, 5 balabaqsha, 4 meditsina uiymy, 1 mádeniet úii men 10 dúken sý astynda qalǵan. Sonymen qatar Jeńis aýylyndaǵy kópir men respýblikalyq jáne oblystyq mańyzy bar 54,7 km avtojol sý astynda qalǵan. Budan basqa, 7 639 gektar egis alqaby zardap shekken. Sondai-aq sý basqan aýmaqtaǵy ólip qalǵan mal sany naqtylandy. Búginde keltirilgen zalaldy esepteý jalǵasyp jatyr.
Aýdanda tártipti saqtaý jáne sý astynda qalǵan eldi mekenderdegi múlikti qorǵaý úshin 8 blokpost qoiylǵan. Politsiia departamentiniń jeke quramynyń 303 qyzmetkeri men 53 arnaiy tehnika tartylǵan.
Nurly jol, Órgebas, Yrysty, Jantaqsai eldi mekenderinde sý basýdy boldyrmaý maqsatynda bógetter salyndy, Firdoýsi eldi mekeniniń mańynda Myrzakent baǵytynda kollektor ornalastyryldy. Sonymen qatar, Maqtaaral aýdanynda sýdy jyldam shyǵarý úshin ózbek tarapy kanal qazdy.
«Jalpy, biz ózbek mamandarmen tyǵyz árekettesip otyrmyz. Ózbekstanda jaǵdai turaqtaldy. Sondyqtan olar óz tehnikasymen kelip, bizdiń kollektorlardy tazartyp berýge ázir», — dedi Ó. Shókeev.
Sý astynda qalǵan eldi mekenderden sý ketken soń Arys qalasyndaǵy tótenshe jaǵdai tájiribesi boiynsha ár aýla aralanyp, ár otbasynyń shekken zardaby baǵalanady. Odan soń komissiia úilerdiń qalai qalpyna keltiriletinin sheshedi. Sonymen qatar, árbir zardap shekken otbasyǵa ótemaqy tóleý múmkindigi qarastyrylýda. Ó. Shókeev egis alqaptary sý astynda qalǵan sharýalardyń shekken zalalyn óteý qajettigin de atap aitty.
«Biz evakýatsiialanǵan turǵyndarmen túsindirý jumystaryn júrgizip jatyrmyz. Halyq bul jaǵdaida túsinistik pen sabyrlyq tanytýda. Ózbekstanda da jaǵdai qiyn. Onda 10 eldi meken sý astynda qalǵan, 70 myń adam evakýatsiialanǵan. Biz osy qiyn jaǵdaidan ortaq kúsh-jigerimizben shyǵý týraly kelisimge keldik», — dep túiindedi Túrkistan oblysynyń ákimi.
